Tura:U Mukul Sangma, nongialam liang pyrshah ha dorbar Jylla, ula ia kynduh ia ki nong ialam Congress mynta ka sngi ha Congress Bhavan ha Tura, ha kaba ula pdiang sngewbha ruh ia ki lai ngut ki MDC, kiba wan kyrshan ia ka seng Congress ha kane ka elekshon Lok Sabbha kaba mynta.
Haba kren ha ka jingialang, U Mukul, u ong ba U Conrad Sangma, un donkam shibun ban duriap bha, ha shwa ba un sngewthuh shaphang ka jingthung dieng agar, kaba dei ban thung ha ki jaka jong ki briew shimet bad u ong ruh ba ka dei lyngba ka sorkar jongu, ba la ailad ban die ia u dieng agar. U Mukul, u jubab ia katei halor ka jing kynnoh jong U Conrad Sangma, ba katei ka skhim kam dei kaba ai jingmih bad kaba bam kruin ia ka pisa jong ka sorkar Jylla.
U Mukul, ula kynnoh shuh shuh ba U Conrad Sangma, u dei tang u tyngshop, ha kaba ki don kiwei pat kiba pyniaid na shadien jongu. U Mukul, u ong shuh shuh “Nga sngewsih ban iohi ba kumno U Conrad, ula pynsniew dur lut ia ki kam kiba ngi la lam khmat bad kaei kaba u leh, ka long ba u shu kren bad um ju trei eiei. Kine ki Sangma shi para, ki ong ba nga don ia ka karkhana shna maw nongrim, namar ba ka sorkar jongnga ka trei khlem shongthait ban sdang ia ki projek bapher bad ki don ruh na kiba la dei ban trei pyndep bad mynta kitei ki shi para, kim sngew lehrain satia ban plie ia kitei ki projek kiba la buh da manga bad ka sorkar jongnga. Ki ong ruh ia nga u myntri rangbah nongrwai, namar ba nga biang ia ki jingrwai, katba mynta pat U Conrad ruh ula rwai ialade ha ka prokram telebishon, te phin khot kumno ia u pat?”.
Ka jingwad jingtip jong ka PRS PRS Legislative research, ka pyni ba kumno ka Agatha Sangma, ka la trei ha ka por ba ka long MP bad katei ka jingtip, ka pyni ba ka jingpoi jong ka Agatha sha Parliament, ka long 49 percent bad ka jingshim bynta jongka, ha iing dorbar ka long nod bad ka jingleit rah ia ki mat iakren ka long nod. “Kumta kumno ka Agatha Sangma, kaba dei ban kren ia ka sur jong u paidlang ka Tura, kiba la kyrshan ia ka, ne ka dei ba u paidlang na Garo, ula jied ia ka, ba kan leit shangkai sha New Delhi. U paidlang ka Garo Hills, u dei ban peit ia ki jingshisha bad um dei ban ngeit ha ki jingkular bad ki jinglamler suda” ong U Mukul Sangma.
U Mukul, ula kren ruh ba ula pyntreikam ia ka skhim Meghalaya Health Insurance Scheme, ka skhim kaba ai jingsumar ia kito kiba duk ba rangli bad ula sdang ia ka skhim, kaba ai jingiarap ia ki khunswet kiba kwah ban ia poi kha bad ula kynthoh ruh, da kaba ong ba baroh shi katta, la shu phah ban long MP, tang na kawei ka long iing bad ka la dei ka por ban kylla bad ban jied ia ka jingkylla, ong U Mukul Sangma.
U Mukul Sangma, ula ong ruh ba ka NPP bad ka BJP, ki long tang ki ar liang jong kajuh ka pisa bad ha ka por elekshon, ki pyni ba ki ialeh pyrshah, hynrei ki ia long kajuh bad ki iadon lang ha kajuh ka sorkar NDA, kaba la khlieh da ka BJP.
Phi don ban ong eiei?