Kitbok U Lat ia ki nongpang ha Ganesh Das bad Civil hospital

Shillong, 07 Iaiong:
U Lat ka jylla Meghalaya u V Shanmu ganathan mynta ka sngi u la leit iuhkjat ha Ganesh Das bad Shillong Civil hospital, Shillong kaba dei ka sngi rakhe kum ka Sngi Ka Koit Ka Khiah ha Pyrthei. Ha kane ka sngi, u Lat u la rung ha man ki kamra jong kane ka hospital bad iakynduh ia ki nongpang uba kylli bad iakren bad ki.
Nalor ka jing ia kynduh ia ki nongpang, u Lat u la jngoh ruh ia ki jaka buh mashin kum ka ultra sound,  jaka thiah ki nong pang shynrang bad kynthei, jaka puid, , ENT, Oncology bad kiwei.
Ha ka jingkynduh bad ki nongpang, u Lat u la kylli ia ki shaphang ka rukom sumar, ka jing sngew jongki bad u la kitbok ba kin koit noh.
Ia u Lat la synran da u myntri ka koit ka khiah u Bah AL. Hek, u Y. Tsering u Additional Chief Secretary, u M. S. Rao u Principal Secretary jong u Lat, u Bah M. R. Synrem bad u Bah K.W. Marbaniang ki Secretary ka tnad ka koit ka khiah, u Dr. W. Wankhar, DHS, MI, u Dr. B. Mawlong, Medical Superintendent, Civil Hospital Shillong, u Dr. T. Wahlang, Medical Superintendent, Ganesh Das Hospital, Shillong bad kiwei de ki heh sorkar Jylla.