Nongpoh, 29 K’lyngkot: Ka Dorbar Shnong Mawlasnai, mynta ka sngi ki la pynlong ia ka jingialang paidbah ha Madan Mawlasnai bad kata ka long ban ai ka jingkhublei kitbok kitrwiang ia u Bah Joplin Sten, u riew rangbah na ka shnong Mawlasnai bad uba long mynta kum u kyrtong ka NPP ha kane ka Ilekshon jied nongmihkhmat sha ka Khasi Hills Autonomous District Council (KHADC).
Ha katei ka jingialang, la jan baroh ki briew napoh ka shnong Mawlasnai ki la iamih ryntih, kata naduh nongialam shnong, ki nongshong shnong kiba kynthup naduh ki longkmie, ki riewrangbah bad ki khun Samla.
Haba iadei bad katei ka prokram leh burum ia u Bah Joplin Sten, na ka liang u Bah Aibok Masharing, Sorbar Shnong ka Mawlasnai, u la ong ba kane ka jingialang kam da mut eh ba ka shnong ka leh politik, hynrei namar ba u trai shnong bad kum u rangbah na ka shnong, u mih ban iakhun ha kane ka ilekshon bad kumta ka dei ka kamram jong ki nongialam shnong bad ki paidbah, ba kin ai ia ka jingkitbok kitrwiang.
Na kaba la pynpaw da ki nongialam shnong ka Mawlasnai, la ong ba u Bah Joplin Sten, u dei u briew uba la trei na bynta ka bha ka miat ha shnong ha thaw bad uba la long teng kum u Sordar ka shnong Mawlasnai, nalor nangta u la long teng ruh kum u President ka Mawlasnai Sports Club.
Haba phai pat ia ka jingkren jong u Bah Joplin Sten, u la ai ia ka jingsngewnguh ia ka Dorbar Shnong bad kumjuh ia ki para Nongshong Shnong jong Mawlasnai, namar ba ki la ai mynsiem ha ryngkat ka jingaikhublei kitbok kitrwiang ia u, ha kaba kum kane ka kynti ba u la mih madan ban iakhun ha kane ka ilekshon MDC.
Phi don ban ong eiei?