KINE KI DEI KI SOH BA MIH NA KA RP?

SP RNGIKSEH

Ka mat pynthymmai ia ka Reservation Policy(RP) ka la pynkhih ia ki paidbah jong kane ka rilum khasi ha kine ki sngi kiba la dep bad na kane ka jingjia ngi lah ban iohi ia ki jingmih kiba kham kongsan,kiba long ka jingmyntoi ia ki khun khasi-khara jong kane ka jaitbynriew jong ngi.

Kaba nyngkong ka long,ka jingsngewthuh ka jaitbynriew KHASI shaphang la ki jong ki hok kiba dei ban ioh bad ki la ia shimkhia da kaba ieh ia la ki kam ki jam ban iawan najan najngai ban ai ka jingkyrshan ia kane ka mat pynthymmmai ia ka ain thungkam thungjam (Job Reservation Policy 1972).Ka jingsngewthuh jong ki paidbah halor kane ka mat kaba donkam, ka la pynlong ia ki lak ngut ki khun u hynniewtrep ban kyndit bynriew ia ka jingdonkam ban iatylli kawei khnang ban ioh ia la ki jingdawa bad ia la ki hok.Kumba ka la long ngi iohi ia ka dak jong ka jingiatylli kum kawei ka jaidbynriew lyngba kane ka jingiakhih.

Lada ki paidbah ki sngewthuh shisha ia ka jingdonkam ban teh song ia la ka jaitbynriew khasi ban ialong kawei, DEI KANE KA POR KABA BIANG EH.
*Baroh ngi kwah ban iohi ia ka lawei jong ka jaitbynriew KHASI kaba im bad kaba kiew shaphrang ha ki liang baroh.

Kaba ar pat kaba la jia ka long kaba phylla bad kaba pynlyngngoh ban iohi ia kiba bun ki briew kiba wan tuid sha kane ka lympung na ki niam bapher bapher ym donkam ban da jer kyrteng ia ki jaitniam baroh, hynrei ki la iapoi lut ha ka kyrteng jong ka jaitbynriew KHASI bad kim sngewlehrain ban pyrta sha u Blei sha u Trai Nongbuh nongthaw,ki pynlong ia ki jingrwai kyrpang,ki jingrwai ieit ri,ki jingrwai niam,bad bun bah ki phai khmat sha u Blei Trai Kynrad ban dwai ban ainguh bad ban khot kyrpad ia ka jingiarap ka jong u ha kaba rieh bad ha kaba paw.Hato kane ka dei tang kaba shu pynkhih ia ka jingsngew(emotion),ngim lah ban len ba don bun kiba kum kita,hynrei don kiwei pat ia kiba u Trai Nongbuh Nongthaw u la ktah ia ki mynsiem jong ki bad khamtam ka jingiatiplem ka la ktah ia ki jingmut jingpyrkhat jong ki.

*Hato kane ka lah ban dei ka dak jong ka jingbha kaba lah ban wan ha kane ka ri kaba ieit jong ngi, ban iohi pat sa shisien ia ka longbriew manbriew kaba bha bad kaba hok?.

Kaba lai ka long kaba kham kongsan,lada ngi hap ban pynshongdor ia ka jinglong jong u Nongialam, ngi iohi ia ka jinglong kaba skhem bad ka jinglong rangbah jong u Bah Ardent, ym tang katta ka jinglong kaba shlur kaba don ha u bad ka jingsngewthuh ba u ieng halor ka nongrim kaba shisha.Lada ngi pyrshang ban ia nujor bad ki jingiakhih kiba la dep ha ki snem kiba mynshuwa, ym don kum kane, ha kaba ki paidbah baroh ki ngeit ia ka jingbthah ka jong une u Nongialam ban long kiba jai jai.Naduh basdang haduh ban da kut ka jingiakhih, ym shym la don kano kano kaba pynkulmar ia ka shongsuk shnongsngain ha ka Jylla.La kumno kumno ruh ngi iohi ba une u Nongialam u la aiti nyngkong ia lade ha u Blei bad u lah ban ieng skhem bad kut jingmut ban shah thngan khlem buh por naduh ka 23tarik u Jymmang haduh ka 1tarik u Jylliew 2023.Ka long kaba phylla ban shah jingit ban shah thngan haduh 10sngi, khlem bam hynrei tang da ka um bad ba la pynshisha da ki doctor kiba la ai ia ka report. U la shah thngan khlem khih u la ieng triang ryngkat lem bad ki paidbah jong ka ri ban ia khun ia kane ka mat.
*Ka jaitbynriew ka donkam ia ki Nongialam bad ia ki riewshynrang kiba shlur kum kine.

Bad kaba saw pat da long kumno kumno ruh baroh ki MLA Khasi ki la ia kyrshan lang ban pynthymmai noh ia ka Reservation Policy 1972, wat lada don kiwei pat ki bym sngewiahap ban kyrshan ia kane ka mat, ki ialeh ban buhrieh ia lade namar ki dang sngewkwah ban iaid da ka lynti kaba rim namar kane ka lynti kaba thymmai ka eh than ia ki,hynrei ha kaba kut ki la iarah kti lut ban ia mynjur ban don noh da ka Expert Committee.Kane ka dei ka result kaba bha.
*Ka jaitbynriew ka khmih lynti ba ki party riewlum bad ki MLA khasi baroh kin ia tehsong kawei.

Bad kaba khatduh ka long, ka jubab kaba bha jong ka Sorkar kaba la pynkmen shikatdei eh ia ki paidbah kiba ap ia ka khubor kumba ki la angnud,bad kata ka long ba ka sorkar ka la mynjur ban ia kren halor ka jingdawa ka VPP bad pynthymmai ia ka RP,da kaba ka la shim ia ka rai ban thung da ka Expert Committee,bad haba ka sorkar ka la thung ia kane ka Committee kumba ngi iohi lyngba ki lad pathai khubor,baroh kiba la ia kyrshan ki la ia shad kmen ia kane ka jingjop kaba donburom bad ka 1tarik u Jylliew 2023 ka la long ka sngi basah jingkynmaw ia ka ri bad ka jaitbynriew khasi,namar ba ka sorkar ka la pynpoi ha u Bah Ardent Miller Basaiawmoit ia ka Notification kaba la pynmih da u Lat ka jylla ba la thung ia ka Expert Committee na ka bynta ban review ia ka Reservation Policy 1972.
*Ki paid nongshongshnong ka ri khasi ki dang ap ba ka sorkar kan bishar hok bad leh hok halor kane ka mat jingpynthymmai ia ka RP.