Kiew stet ka corona ha ka jylla, 137 ngut mynta ka sngi

Shillong: Kiba pang corona, ki la nang kiew stet ha ka jylla bad mynta ka sngi, ki don 137 ngut kiba ioh pang thymmai.

Na kitei ki kynthup ia 111 ngut ha East Khasi hills bad kitei ki kynthup ia 62 ngut kiba wan phai na shabar jylla, 15 ngut ki high risk contact, 3ngut na Mawlai, 12 ngut ki ILI, uwei u pulit bad 6ngut kiba leh screening nalor kiwei pat.

Ha Ribhoi, ki don 9ngut bad na kitei ki kynthup ia 7ngut kiba wan phai na shabar jylla bad 2ngut kiba pang ILI, ka West Jaintia Hills, ka don 7ngut bad kitei ki kynthup ia 2ngut ha Bakur, 4ngut kiba wan na shabar jylla bad uwei uba leh screening.

Ha West Khasi Hills, ki don 4ngut, ha kaba 3ngut kiba wan na shabar jylla bad nangta iwei iba leh screening.

Kiba jem na ka jingpang, ki long mynta 34 ngut baroh bad baroh kiba don ia ka jingpang covid ha ka jylla, haduh mynta ka sngi, ki long 857 ngut, ha kaba ha East Khasi Hills, ki long 618 ngut bad ha West Khasi hills 22ngut, South West Khasi Hills 7ngut, Ribhoi 56 ngut, West Jaintia hills 119ngut, East Jaintia hills 19ngut, West Garo Hills 14ngut. Baroh kiba la jem, ki long 14,105 ngut bad kiba iap, ki long 154 ngut baroh.