Kiew sha ka 4ngut kiba iap coronavirus ha Assam, kiba pang sha ka 115 ngut

Guwahati: Sa uwei u briew, ula iap, na ka jingpang COVID19 ha Assam. Katei ka long, hadien ka jingiap jong uwei u nongpang ha ka Lah Sngi U Blei.

U Himanta Biswa Sarma, myntri ka koit ka khiah ka sorkar Assam, u iathuh ba utei uba iap, u dei uba shah sumar ha Gauhati Medical College Hospital (GMCH).

Hynnin ka sngi, la lap shuh sa 7ngut kiba ioh ia katei ka jingpang, ha ka sor bah Guwahati. Mynta ki la poi sha ka 115ngut kiba ioh ia katei ka jingpang ha Assam. 3 ngut na kitei, ki dei kiba na ka quarantine centre ha Sarusajai Stadium, 3 ngut kiwei pat, ki dei kiba ia bit na kito kiba ioh pang, na ka kudam phan, ha Fancy Bazaar.