Kiew kiba ioh pang khlam corona ha Manipur, sha ka 4,687 ngut

Ka khlam corona virus, ka la nang kiew ha Manipur, ha kaba hynnin ka sngi, ki don 118 ngut kiba ioh pang thymmai bad kumta kiba ioh pang baroh, ki la poi sha ka 4,687 ngut.

Kitei kiba ioh pang, ki kynthup ia 1,216 ngut ki shipai central armed police force (CAPF) bad kiba dang don ha katei ka jingpang, ki long 1,936 ngut haduh mynta ka sngi.

Hynnin ka sngi, ha ka kyrwoh khubor, la iathuh ba 53ngut ki dei ki shynrang bad 41 ngut, ki dei ki kynthei kiba ioh pang covid 19 na ki riew paidbah bad sa 24 ngut ki dei ki shipai CAPF.

Ha Nagaland, ki don sa 61 ngut kiba ioh pang COVID19 hynnin ka sngi bad baroh kiba ioh pang, ki la poi sha ka 3,455 ngut. La iathuh ba 34 ngut na kitei ki dei na Dimapur, 24 ngut na Kohima, 2 na Zunheboto bad uwei na Mokokchung.