Kiew kiba iap sha ka 492 ngut bad mynsaw 1645 ngut, ba ther bom ka Israel ha Lebanon

Ka jinghiar thma ka Israel pyrshah ia ki Hezbollah, ha ka sngi nyngkong, ka la pyniap ia 492ngut ki briew bad kiba mynsaw, ki la poi sha ka 1,645 ngut. Katei ka dei ka jinghiar thma kaba jubor tasam kaba la jia hadien jong u snem 2006. La iathuh ba ki ehrang Hezbollah ruh, ki la ther namding sha Israel, haduh 200 tylli, sha ki bynta ba shatei jong ka Israel, ban pynhiar kput, halor katei ka jingshah ther bom hynnin ka sngi.

Ki don da ki phew phew hajar ngut, kiba la phet krad na ki shnong jongki, shathie jong ka Lebanon, na katei ka jinghiar thma jong ka Israel bad hynnin ka sngi, ka Israel, ka la ther ha ki 1,600 tylli ki ktem jong kitei ki ehrang bad kaba dei ruh ka jingpyni bor kaba jubor tam ha kine ki phew snem ba ladep.