Kiew ki kali jngohkai na Assam, sbak khapngiah ka Toll Gate ha Pahammawlein

Nongpoh:Ka jingkiew ki kali jngohkai na Assam sha Meghalaya, ka jubor bha hynnin ka sngi Saitjain bad ia kata ka iohi ba bun na ki jaka bam ha Ri Bhoi, la dap tang da ki kali na Assam.

Kawei na ka sakhi kaba la iohi ia ka jingbun ki kali Assam, kiba la kiew sha Meghalaya, ka dei hapoh ka Toll Gate kaba don ha Pahammawlein, Ri Bhoi, ha kaba ha kitei ki kynta ba kiew ki kali Assam, katei ka jaka khrong khajna jong ka HNAI, ka la khapngiah hi sbak.

Na kaei kaba la iohi, ka long ba ka jingkiew Meghalaya da ki briew na Assam, ka kham jur eh ha ka sngi Saitjain bad Sngi u Blei, ha kaba la iohi ba ki da ki hajar tylli ki kali na Assam, ki kiew sha Meghalaya, na ka bynta ban peit ia ka jingitynnad ka mei mariang ha Meghlaya.