Kiew ka MLA skhim sha ka T. 2 klur

Shillong, 15 Lber:
U Myntri Rang bah ka jylla u Mukul Sangma hynnin ka sngi u la pynbna ba ka sorkar kan pynkiew ia ka Sepcial Rural Works Programme (SRUP) bad ka Special Urban Works Programme (SUWP) kaba ju tip paid bah kum ka MLA skhim na ka T. 1 klur sha ka T. 2 klur shi snem ia uwei pa  uwei u MLA baroh 60 ngut ha ka jylla.
Da kane ka jingpynkiew, uwei u MLA un ioh T.10 klur ha ka san snem ka MLA skhim ba un pyntreikam ha ki konstitwensi jongu.
Haba wanrah ia ka mang tyngka jong u snem 2016-17, u Mukul u la ong ba kine ki skhim ba la ai ha uwei pa uwei u MLA, ki la wanrah ia ka jingmyntoi ia ki paidbah jong ki konstitwensi bad namarkata, ka sorkar kan pynkiew noh ia ka mang tyngka na ka T.1 klur sha ka T. 2 klur shi snem ia man uwei pa uwei u MLA ha kane ka mang tyngka. U la buh jingkhein ruh ban pynlut T. 811.85 klur ha kane ka bynta kaba hap ha ka tnad Community and Rural Development.
Nalor kane ka MLA skhim, u Mukul u la ong ba kiwei ki skhim kum ka Construction of Road Programme, ka Chief Minister Special Rural Development Fund bad kiwei kin iai bteng ban treikam ha ki jaka nongkyndong.