Kiew ka jingiap na ka jingpang Corona sha ka 361ngut

Ka jingiap ha China, na ka jingpang Corona, ka la poi mynta sha ka 361ngut, ha kaba tang ha ka Sngi U Blei, ki la iap 57ngut bad kiba ioh ia katei ka jingpang haduh mynta ka sngi, la iathuh ba ki don baroh 17,205ngut, ong ka khubor jong ka sorkar China.

Ka kaiphod jong ka National Health Commission jong ka China, ka iathuh ba ki don mynta 2,829 ngut kiba dang shu ioh thymmai ia katei ka jingpang ha katei ka Ri.

Kiwei pat ki lad khubor ki iathuh ba ka Jylla West Bengal, ka dang wad mynta ia ki phra ngut ki briew, kiba wan na China, na ka bynta ban pyn thikna, la ki dei kiba don jingpang iabit Corona ne em. Kitei la iathuh ba ki la wan lang bad ki samla pule kiba na Kerala bad la iathuh ba kitei ki la hiar khyndew ha kad liengsuin ha Kolkata ha ka 23tarik Kyllalyngkot 2020.