Kiew ka jingiap sha ka 130ngut, jah rngai 500 ngut ha ka jingshlei Um

Dehradun, 18 Jylliew:
Ka jingshlei um, ka nang jubor mynta ka sngi, ha kaba ka la jia ka jing julor kaba la jubor bha ha Uttarakhand bad ha Himachal Pradesh, kaba la pyniap ia 130ngut ki briew bad sa 70hajar ngut ki riewniam, kiba la shah ker sawdong ha ka um.
Ka jaka mane blei kaba khraw ha Kedarnath kaba ha Rudraprayag district jong ka Uttarakhand ka la shah tap ha ka ktieh, na ka jingkawang ka umsaw bad la iathuh ba ki don 500ngut ki briew, kiba don ha katei ka jaka, kiba la jah rngai, ong ki lad khubor.
La iathuh ba ki don haduh 8hajar ngut eiei ki briew, kiba sah kut mynta, ha katei ka temple ha Kedarnath, kaba la shah rong noh ha ka umsaw bad ki don sa 2,500ngut kiba sah kut ha Hemkund Sahib bad 8hajar ngut ha Badrinath.
Ka jingiap, kaba la poi sha ka 130ngut, ka la ktah kham bun ha Uttarakhand, ha kaba ka jingiap, ka la poi sha ka 52ngut. Ka Rudraprayag district ka dei kaba la ktah jur ha katei ka jingjia, ha kaba 20ngut ki briew, ki la iap bad 73tylli ki iing ki la khyllem, ba kynthup ia 40tylli ki hotel kiba don ha ki rud wah jong ka Alaknanda.
Ha Uttar Pradesh, ki la don bun bah ki briew, kiba la pynkynriah jaka shong, namar ka jingnang kiew ka Um.
Ki dang don mynta sa 71,440ngut ki riew niam kiba mut ban leit sha ka temple ha Kedarnath, kiba shah ker kut ha ka um ha Badrinath, Gangotri bad ha Yamunotri kiba sah kut Rudraprayag, Chamoli bad Uttarkashi district jong ka Jylla Uttarakhand.
Ki don bun bah ki helicopter, kiba la leit ban iarap ia ki riew shem lanot ha Uttarakhand bad ha Himachal Pradesh ruh kumjuh.
U myntri rangbah ka Himachal, U Virbhadra Singh, uba la shah ker kut ha ki bynta jong ka Kinnaur district, haduh 60 kynta eiei, ula ioh mih na katei ka jaka, hadien ba la wan ia ka helicopter da ka seng Congress.
Ha kawei ka jingjia, la iathuh ba hynniew ngut ki briew, na kawei ka long iing, ba kynthup ia ar ngut ki khynnah rit, ki la iap, ha ki bynta jong ka Rudraprayag jong ka Uttarakhand.
Kitei ki kynthup ia U Omprakash Pandey (60), ka kurim jongu, ka Shushma Pandey (55), u khun jongu, U Anuj Pandey (32), ka kurim jong U Anuj, ka Kushuma (28), U Abhi (8), U Anshu (5) bad ka Premlata Mishra (22) jong ka Lakshmi Purva, ki la shah rong ha ka jingshlei ka wah Ganga bad kitei ki sah miet ha ka hotel Gauri Kunda Birla, ha ka jingleit jongki sha Kedarnath. La iathuh ba ka hotel hi baroh kawei, ka la shah rong lut ha ka Um.