Kiew ka jingiap ha Gaza, sha ka 313 ngut, ha ka jingkhyrwit ba tyngeh jong ka Israel

Tel Aviv: Ka thma kaba triem bha, ka dang iai bteng, hapdeng ki shipai Israel bad ki ehrang Hamas, ha ki bynta ba shathie jong ka Israel bad katei ka dei hadien 24 kynta, ba ki ehrang, ki la hiar thma kyndit kyndit ia ka Israel.

Shatei jong ka Israel, ka don ka jingsiat namding na Lebanon, ha kaba ka seng Hezbollah, ka la khyrwit na ki bynta ba shatei jong ka Israel, mynta ka sngi. Ki shipai jong ka Israel, ki iathuh, ba ki la siat namding, sha ki ktem jong ki Bezbollah, kiba don ha khappud ba shatei jong katei ka Ri.

Ha ka jinghiar thma, ki ehrang Hamas, hynnin ka sngi, ki la don 300ngut ki nong Israel, kiba la iap bad ka Qassam Brigades, kaba dei ka tnat ialehthma jong ki Hamas, ka kam, ba ka jingialeh, ka dang iai bteng, ha ki bynta ba shathie jong ka Israel. Na ka liang ka Israel, ka kam, ba ki don 313ngut ki briew, kiba la iap ha Gaza, ha ka jingleit hiar thma, ba la ialam, da ka Israel Defense Forces bad baroh, kiba iap, ha kine ki arsngi ba ladep, ki la poi sha ka 613ngut. Ka Israel Defence Force (IDF), ka kam, ba ki shipai jongka, ki dang ialeh pyrshah bad ki Hamas, ha ki bynta ba shathie jong katei ka Ri, kiba kynthup ia ka Ofakim, Sderot, Yad Mordechai, Kfar Azza, Be’eri, Yatid bad ka Kissufim.