Kiew ka jingbun ki hati, sha ka 78 tylli ha Nongkhyllem

Shillong, 21 Naitung:
Ka khlaw ka tnad Forest ka jylla ha Nong khyllem ka Ri-Bhoi district, ka dei kawei kaba heh tam ha Khasi Hills na ki jaka ba la buh kyrpang ka sorkar ban shong ban sah ki mrad.
Katkum ka khana sumari ia ka jingdon ki mrad ha katei ka Khlaw bad kiwei ki jaka ha ka Ri-bhoi district ha u snem 2008, ka jingdon jong ki hati ka la nangkiew. Ha une u snem, ki don 78 tylli ki hati katba ha u snem 2002, ki don tang 54 tylli kaba mut ba ka jingkharoi jong ki hati ka la kiew sha ka 24 tylli tang hapoh kane ka san snem.
Ha u snem 1998 ki don 53 tylli bad ha u snem 1993 ki don 50 tylli.
Nalor ki hati, ha kane ka khlaw sorkar, ki don bun kiwei ki mrad kum ki khla bapher bapher, ki shrieh, ki tngaw, ki sniang khlaw, ki huleng, ki sier, klew, syiar khlaw, bad kiwei.
Katkum ka jinglap ka tnad khlaw, ki don haduh 400 tam eiei ki jait mrad, kiba im ha kane ka khlaw ka sorkar, la ong u DFO Bah WS Marngar haba iakren hynne ka sngi Hatmajai.
Kane ka khlaw ka sorkar ka dei ruh ka jaka pule bad wad jingtip ia kito ki briew kiba pule kum na NEHU bad na kiwei ki jaka, ki la wan ban leh ia ki jingwad bniah jongki.
U Bah Marngar, u la iathuh ba ha u snem ba la dep ruh ki don ki samla pule kiba leh ia ka jingwad bniah ha katei ka khlaw da kaba pyndonkam da ka trap camera da kaba wah ha ki dieng bun sngi ban ioh ring ia ki mrad ba iaid ba ieng ha katei ka ka khlaw.