Kiew dor kynsan ka Dewbilat, suba “ba bei tyngka elekshon”

Shillong,8 Iaiong:
Ka All Meghalaya Contractor and Supplier Association ka la pynpaw ia ka jingsngewkhia halor ka jingkiew dor kynsan ka dew bilat (Cement) sha ka T.340 tyngka shi song kaba long ruh ka dor kaba la thoh ha katei ka song( MRP). Haba ia kren bad u Rupang u General Secretary katei ka Association ki Kontraktor u la ong ba ar bnai mynshuwa ka dor ka dewbilat ka long T.305 tyngka hynrei la pynkiew noh sha ka T.330 tyngka katba mynta ka sngi la pynkiew biang sha ka T.340 tyngka.
Haba la kylli kino ki kompeni dewbilat kiba la pynkiew dor u GS u la ong ba baroh ki kompeni ba don ha kane ka jylla, lait ka MCCL hynrei kane ruh ka la pyrshang ban pyn bud lem ban pynkiew ia ka dor. U GS u la iathuh ba ia ka dor ka mur ka dew bilat la buh dor hi da kita ki nongpyniaid iew kiba ju khot ki Syndicate Group. Ka seng ki Kontraktor ki la sngew diaw halor katei ka jingpynkiew dor kynsan ia ka dewbilat ha kaba u GS u la ong ba nalor ba ki ioh ka jingbei pisa, kaba heh ki pyrshang pat ban khniot ia ka dor.
Ki Kontraktor ki la suba jur ruh ba katei ka jingpynkiew dor kynsan ki kompeni Cement ka lah ban dei na ka daw ba ki bei tyngka ia ki kyrtong kiba ia khun ha kane ka elekshon.Halor katei ka jingpynkiew dor kynsan na ka liang ki Kontraktor ki la ong ba shen kin sa leit ia kynduh ia ki Syndicate Group ban ia kren bad ki. Ki la pynpaw ruh ka jingsngew lyngngoh ba la die ia ki dewbilat katkum ba la thoh ha ka song, namar ki dei ki dewbilat kiba la pynmih na kane hi ka jylla bad ki nongthied ruh ki dei na kane hi ka jylla kaba ki nang pyrkhat ba kumba ju long ka dor die bad kaba la thoh ka ju ia pher, hynrei mynta pat ki die beit katkum ba la thoh. Ka seng ki Kontraktor ka la kyrpad ruh sha ki bor sorkar ban shim khia lem halor katei ka jingleh ki kompeni pynmih dewbilat.