KIEI KINE KI LABANG-NONGPHYLLUT…….?

(ba bteng).

M.M.Thaiang

Ka Thain Labang-Nongphyllut, Elaka u Dolloi Nongphyllut ka dei ka bynta jong ka Ri Jaintia ( Part and parcel of Jaintia Hills) naduh hyndai hynthai kulong kumah. Ki Phareng (British) kiba synshar ia ka Ri India bad ia ka Hima bah u Syiem Jaintia lane u Syiem Sutnga, haba ka la iohi ba ki Labang- ki Nangphyllut( Nongphyllut), ki dei ki Pnar ( Jaintias) kam shym la pynkhlad ia kane ka Elaka u Dolloi Nongphyllut na ka Ri Jaintia kumba ka la pynkhlad ia ka Thain Jaintiapur kaba don mynta hapoh Ri Bangladesh bad ia ka Thain Kut Sajar kaba don mynta hapoh ka North Cachar Hills. Wat hadien ba ka Ri India bad ka Hima bah u Syiem Jaintia ki la ioh ia ka jinglaitluid na ka jingsynshar ki Phareng (British,s rulers) ha ka 15 tarik August 1947, kane ka Elaka u Dolloi Nongphyllut ka don hi hapoh u pud u sam jong ka Jaintia Hills (Jowai Sub-division ha kata ka por).

Hadien ka jinglaitluid, haba ka Ri India bakhraw ka la kylla ka Sovereigne Democratic Republic, kaba don la ka jong ka Constitution bad la mih ka Sixth Schedule da ka jingthmu ban iada ia ka hok, ia ka jingroi jingpar jong ki ‘riewlum bad ka Sorkar Assam kaba synshar ia ka Ri ki Laiphew Syiem bad Khat-ar Dolloi, na ka bynta ka jingbit jingbiang ka jingsynshar jong ka, ka la thaw sa kawei ka District, ka District United Mikir ( Karbi-Anglong ba mynta) bad North Cachar Hills bad ha kane ka jingthaw ia ka District kaba thymmai,da kaba KHLIAH na KDIAH JUBOR ( Forcibly tagged) na ka Ri Jaintia( Jowai Sub-division) ia shi bynta ka Elaka u Dolloi Raliang, shibynta ka bynta jong u Dolloi Shiliangmyntang, shibynta ka bynta jong u Dolloi Nongjngi bad baroh kawei ka Elaka u Dolloi Nongphyllut.

Ki Nongshong shnong ka Thain Nangjrong( Nongjrong), ka Thain Labang- Nongphyllut, Elaka u Dolloi Nongphyllut, haba ki la tip ia kane ka jingthmu jong ka Sorkar Assam ban pyniasoh ia ka Elaka jong ki ( Elaka u Dolloi Nongphyllut) bad kane ka District United Mikir bad North Cachar Hills, hapoh ka jingialam jong u Pa Dolloi, u Dolloi Salad bad u Waheh Sip Sutong, Secretary ka Elaka Dorbar, ki la pynlong ia ka jingialang paidbah ha ka 27 tarik January 1948, ha shnong Umbasoo( Umwasoo) ha kaba ki la phah ka rai jong ka Dorbar sha u Sub-divisional Ossicer jong ka Jowai Sub-division la ai kopi ( Copy) sha u Premier jong ka Assam, sha u Rev. J.J.M Nicholroy,sha u Chairman ka Mikir Hills Boundary Commission, Golaghat, sha u Deputy Commissioner ka Unted Khasi and Jaintia Hills, Shillong bad sha u MLA ka Jowai.

Ka Rai jong ka Dorbar ka ong kunne:- “ NGI KI PAIDBAH LABANG-NONGPHYLLUT KI KHUN KI HAJAR JONG U DOLLOI NONGPHYLLUT, NGI IOH IA KA KHUBOR BA SNGEWSIH IA KA JINGMUT BA SNIEW JONG KI MIKIR BAN KYNTHUP LANG IA NGI, HA KA JINGIALEH JONG KI BAN IOH LA KA JONG KA DSISTRICT. DA KABA LYNGA BAD PISA JINGMUT NGI LA PYNLUM IA KA DORBAR HA UMBASOO HA KA 27 TARIK JANUARY 1948. HADIEN BA LA IA PYNI NIA BAD BISHAR SANI, DA KAWEI KA JINGMUT, NGI LA RAI BAN PYNPAWSHAI BA NGI KI LABANG- KI NONGPHYLLUT, NGI DEI KI PNAR KIBA PHER BAK LY-BAK NA KI MIKIR HA BAROH KI LIANG. TE NGI PYRSHAH TYNGEH IA KA JINGTHMU BASNIEW JONG KI MIKIR BAD NGI KWAH BAD DAWA JUR BA NGIN SAH HAPOH KA JAINTIA HILLS, JOWAI SUB-DIVISION, KUMBA NGI SHAIT LONG BAROH SHI KATTA”.

Ha ka ktien Phareng la thoh kumne:-

To. The Sub-divisional Officer, Jowai.

Sir,

We the people of Nongphyllut and Labang of Nongphyllut Dolloiship leant with great sorrow the bad motive of the Mikirs to include us with them in their present fight to have their own Sub-division. Being greatly aggrieved, a meeting was held at Umbasoo on the 27th January 1948. The meeting after a long Discussion resolved unanimously that the Nongphylluts and Labangs are Pnar and their customs and beliefs are also different from those of the Mikirs, so they are deadly against the said move of the Mikirs, and wish to remain within the Jaintia Sub-division as they used to be.

Dated Umbasoo Chairman:- Sd/-Salad,Dolloi Nongphyllut 27 /1/1948 Secretary:- Sd/-Sip Sutong

Copy forwarded to:-

(1) The Hon’ble Premier of Assam

(2) The Rev. J.J.M.Nicholray, Minister Assam, Shillong.

(3) The Chairman,Mikir Hills Boundary Committee,Golaghat.

(4) The D.C ,United Khasi & Jaintia Hills, Shillong

(5) The M.L.A. Jowai.

Katba ka jingiapynbeit pud hapdeng ka Meghalaya bad ka Assam kan poi sha ka bynta jong ki Labang-Nongphyllut, Elaka u Dolloi Nongphyllut bad Pangam-raliang, ia kaba ki sorkar Meghalaya bad Assam ki kham iatip kum ka Block I, lada ki kot Khubor kin sngewbha ban pynmih yn phah jingthoh kawei hadien kawei ba ki paidbah kin tip ia ka jingdawa bad jingialeh jong ki ban wan hapoh u pud u sam jong ka Ri Jaiñtia-Meghalaya. (yn dang bteng).