Kiba wan rah pang khlam bun eh ha Nepal, dei kiba wan na India

Ka Nepal mynta ka sngi, ka kynnoh ba kiba ioh pang khlam coronavirus ha katei ka Ri, ki dei bun bah kiba wan na India. Katei ka jingkren, ka dei halor ka jing nang kiew kiba ioh pang ha katei ka Ri, ha kaba kiba ioh pang thymmai, ki long 421 ngut bad baroh kiba ioh pang, ki la poi sha ka 10,000ngut ha katei ka Ri.

Katei ka jingpang, ka la nang pur mynta sha ki 75 tylli ki District na ki 77 tylli kiba don ha katei ka Ri, ong ka tnat ka koit ka khiah. Lyngba ka jingdon kitei ki 421 ngut kiba ioh thymmai, kumta ka Nepal, ka la poi sha ka 9,026 ngut.

U Dr Basudev Pandey, director ka Department of Epidemiology, Ministry of Health, u iathuh ba ki 90 percent, ki dei kiba wan bylla na shabar ri bad kiba bun na kitei ki dei kiba na India bad u iathuh ruh ba 98 percent na kitei ki nongpang, kim shym pyni dak satia ba ki don ia katei ka jingpang. Na kitei ki 421 ngut, ki kynthup ia 64 ngut ki kynthei bad 357 ngut ki shynrang. Kiba iap na katei ka pang khlam, ki la poi mynta sha ka 23 ngut ha katei ka Ri.

Mynta ka sngi, kiba la jem na katei ka jingpang, ki long 194 ngut ba kitei ki kynthup ia 8 ngut ki kynthei bad 186 ngut ki shynrang bad baroh kiba la ioh jingkoit ki long 1,772 ngut, ha kaba 149 ngut ki dei ki kynthei bad 1,623 ngut ki dei ki shynrang bad kiba dang shah sumar, ki long 7,231 ngut.