Kiba shongkha khleh ki hap ban tang Jait thymmai katkum ka dustur

Shillong, 9 Iaiong:
U General Secretary ka HYC u bah Robertjune Kharjahrin u la ong ba ha ka jingwad RTI jong u na ophis u Deputy Commissioner ka East Khasi Hills u la lap ba ki don bun ki bar jylla ne kiwei pat ki jaitbynriew kiba ai jait Khasi ialade tang da kaba shu pynkylla lyngba ka Affidavit. U la ong ba ka jingwad RTI jong u ka dei beit thik tang ia ka East Khasi Hills bad ha katei ka jubab ba u la ioh u la ong ba ki kyrteng jong ki briew kiba dei na kawei pat ka jaitbynriew kiba ai jait Khasi ki bunbha.
Dang shen ar ngut ki bar jylla kiba la ai jait Khasi ki la shah pynduh pyndam ia ka jingling khasi jong ki hadien ba ki rem ia ka jingialeh mukot duma, ong u bah Robert uba la iathuh ba namar ka jingbun palat ki kyrteng na ka liang jong ka HYC ka shu jied iano ban ai mukotduma bad haba jied ia kita ki kyrteng ruh u la ong ba la jied ia kiba la ioh jingtip thikna ia ka ing ka sem jong ki kaba ym lah satia ban pdiang ia ki kum kita ki Khasi. “Ki briew ki bym nang tang ban kren ne thoh khasi ruh, ka rukom im jong ki ruh kam dei shuh kum ki Khasi-kumno ngin lah ban pdiang ba ki dei ki Khasi” ong u bah Robert haba ia kren bad une u nongthohkhubor.
Lah ban kdew ba u Varun Lyngdoh bad ka Sheena Lyngdoh ki khun jong u Shyam Singhania ki la shah pynduh ia ka jinglong Khasi jong ki. U la ong ba kitei ki ai jait Lyngdoh na ka daw ba u kpa ieid jong ki u R.B Lyngdoh u dei u khasi katba ka kmie ieid jong ki pat ka Pamla ka shu shim jait khasi naba kam tip ia ka jait ka khong jong ka. U bah Robert u la ong ba katkum ka riti ka dustur ki briew kiba shongkha khleh lada ki kwah ban ai jait khasi ia la ki khun ki kti ki hap ban Tang jait thymmai. “Kiba shongkha khleh kim lah ban shu ai jait khasi kumto ki hap ban Tang jait thymmai katkum ka Riti ka dustur” u la ong.
Utei u nongialam ka HYC u la ong ba katei ka seng kam pat shongthait hynrei ka dang tih tynrai ia kiwei pat ki briew kiba ka la ioh jingtip bad kan dang wad jingtip shuh shuh sa ha kiwei pat ki District U la ong biang ba bun kiwei pat ki briew na kiwei pat ki jaitbynriew ki shim kabu ban ai jait Khasi ban ioh Schedule Tribe tang ban pynkha pynroi bad pynheh pynsan ia ka kam khaii pateng jong ki.