Shillong: Ki bor pulit ki la pynjur ia ka jingpahara naduh hynnin ka miet bad mynta ka sngi kaba dei ka sngi ba ka NESO ka la khot ia ka pakhang shnong ha baroh kawei ka thaiñ shatei Lam mihngi.
Ki pulit kiba dang pahara ia ka ophis jong ka BJP: Rupang
Haba ia kren hynnin ka sngi, bad u Superitendent of Police (SP) ka East Khasi hills u Davies NR Marak, u la ong ba ki pulit kin buh ia ki khyrdop ha kiba bun jaka ha nongbah Shillong ban talasi ia ki kali kiba iaid ba ieng bad kin iaid pahara ruh kylleng ka sor Shillong ban pynthikna ba kan ym don kano kano ka jingshah pynwit jong ki paidbah bad ki nongtrei sorkar.
U la ong ruh ba ki bor pulit kin ai ka jingpahara kaba jur ia ki ing sorkar, ki kali sorkar bad kin peit ruh ba ki nongtrei sorkar lane ki riew paidbah kin ym shah pynthud ha ka iaid ka ieng jong ki. “Lada ngi lap ba don kino kino kiba pynthud ia ka iaid ka ieng ki paidbah ngin kem beit bad kito ki nongialam jong ki ki kynhun kiba hukum ia ki briew jong ki ban pynmih jingkulmar ruh ngin kem beit, ngin pynthikna ba kan ym don jingpynthud ia ki paidbah” ong u SP haba ia kren bad ki nongthohkhubor. Shuh shuh u la ong ba ki pulit ki la lap ha ki por mynshuwa ba haba don kum kine ki pakhang shnong, ki runar ki ju iaid da ki kali lane da ki thuk thuk ha ki por mynmiet bad dei na kata ka daw u la ong ba ki pulit kin hap ban bat ia ki kali ba iaid bad kin talasi ia ki kali ruh.