Kiba pynkhein quarantine, kin ngat ha ka ain   

Shillong:U bah Prestone Tynsong,symbud Myntri rangbah ka jylla myn hynnin ka sngi, u la maham tyngeh ia ki briew ki don hapdeng ka jingleh Quarantine, ba kim dei ban pynkhein ia ki kyndon quarantine kaba long 28 sngi bad ong ruh ba lada lap ia kino kino ki ba pynkhein ia ki kyndon quarantine kin ngat ha ki kyndon ain.

Kane ka long hadien ba don na  ki briew kiba dang shu wan phai na shabar ka jylla, kiba dang don ha pdeng ki kyndon ka jingleh Quarantine ki la mih bad shang kai sharum shaneng, ha kaba ki lah ban wan rah ia ka jingma kaba khraw ia ka jylla baroh kawei,kumta na ka liang u symbud myntri rang bah mynta ka sngi u la byrngem tyngeh ba lada don ki ba pynkhein ia ka jingleh quarantine,kin ngat ha ki kyndon ain.

U symbud myntri rangbah u la ong ruh ba mynta ban teh la kam ia ka jingsaphriang jong ka khlam Covid-19 ha ka jylla kam dei tang na ka liang ka sorkar, hynrei ka dei ka jingkit khlieh jong uwei pa uwei u briew bad ka long ka ba donkam ban bud pyrkhing ia ki kyndon jong ka tnad ka koit ka khiah, khnang ban lah ban teh lakam ia kane ka jingpang Covid-19 ha ka jylla.
Na ka liang u myntri ba dei peit ia ka tnad ka koit ka khiah u bah Alexander L Hek, u la iathuh ba mynta ka sngi sa kawei ka khynnah pule ka ba dang shu wan phai na Agra ka don ia ka jingpang Covid -19 ha ka jylla. Kane ka khynnah pule ka dei na West Jaintia Hills District.
Ha ka wei ka liang ka nongpang Covid-19 kaba dei na West Garo Hills District mynta ka sngi ka la ioh ia ka jingkoit na kane ka jing pang. Kane ka nongpang ka dei ka ba la test positive ha ka 19 tarik u Jymmang 2020. Kane ka briew ka dei kaba wan phai na Tamil Nadu.
Haduh mynta ki briew ki ba la ioh ia ka jingpang Covid-19 ha ka jylla ki long 31 ngut, kiba la ioh ka jingkoit ba pura ki long 13 ngut, ki ba dang don kane ka jingpang ki long 17 ngut, uwei u ba la khlad na ka jingpang Covid-19. Ki sample kiba la dep phah ban test ki long 9344 tylli, kiba long negative ki long 8993 tylli, kiba dang ap ka result ki long 320 tylli. Haduh mynta ki briew kiba la dep ban wan phai sha ka jylla ki long 12,400 ngut.