Kiba pynjop ngan sam, ki bym pynjop ngan ong ap shiphang, halor ka MP Skhim, ong ka kong Ampareen

Shillong:Ka kyrtong MP ka NPP na Shillong Parliamentary konstitwensi ka kong Ampareen Lyngdoh kala ong mynta ka sngi, ba ka la shim jingkhein antad ba lada ki konstitwensi ki bym don MLA jong ka NPP, kin ai tang 8 hajar vote, ryngkat ki vote jong ki konstitwensi kiba la don MLA, ka la biang ba kan rah ia ka thong.

Ia kane, ka kong Ampareen ka la kren ha ka jingiakynduh jongka ia ki nongkitkam ka NPP Sohiong Block ha phyllaw ka iing jong u MLA barim ka Sohiong u bah Samlin Malngiang.
Ka la ong ba lada kan ioh 8 hajar na ki konstitwensi bym don MLA ka NPP bad lada ioh 10 hajar vote na ki konstitwensi kiba don MLA ka NPP, la ioh 3.20 lak vote eiei na ki 36 tylli ki konstitwensi bad kan rah suk ia ka jingjop.

“Nga la khein kai, katno vote nga donkam na kawei pa kawei ka konstitwensi ba nga donkam ban ioh ban jop ia ka MP, bad na jaka ba don MLA lada ai tang mar 10 hajar vote ka la biang bad ha ki jaka bym don MLA, lada ar tang mar 8 hajar vote, ngin poi 3.20 lak ne 3.25 lak vote”, la ong ka kong Ampareen.
Ka la ong ba na Sohiong konstitwensi kaba ioh u kyrtong ka NPP bah Samlin ha ka MLA elekshon 13 hajar, kan bha ba kin pyntam sa 2 hajar vote kan long 15 hajar vote khnang ban shngain ka jingjop. Ka donkam ruh ban phikir bha iaka mashin EVM ha ka port hep vote ban lait na ka jingleh buit tuh ki briew.
“Nga la iaid kumba 1000 km eiei ha kine ki shi bnai ha ki 67 tylli ki shnong, nga la sah miet sha West Khasi Hills, Ri-Bhoi bad don kiba ong balei ka sahmiet hynrei kane ka long ba kan tip bad sngewthuh ia ki jingeh jong ki paidbah”, la ong ka kong Ampareen.

Haba pynpaw ba lada kan jop kum ka MP, kan pyrkhat shwa ban ai skhim ia kiba pynjop bad ia kiba khlem pynjop, kan sa leh hadien. “Ynda la wan ka bhah ha nga, ia kiba pynjop ngan sam, kiba khlem pynjop, ap shiphang”, ka la ong bad bynrap, “Ha ka jingshisha ngam kwah kren skhim, nga kwah ban kren jaitbynriew ha Parliament ym ha surok, ngam tieng ngan kren beit”.