Kiba pule kolej, ki nang bun, ki kamra pule pat ki neh kumjuh, ong u MR

Shillong:U Myntri Rangbah ka jylla Meghalaya, u Conrad K. Sangma u la ong ba ki kolej ki dei ban pynkhreh ban ïaleh pynïaid ïa ka jingkiew ki samla pule kiba wad jaka pule ba shalor hapoh ka jylla.

Ïa katei u la ong haba kren ïa ka kynhun kiba ha ki kyrdan ba kham shalor ka pule puthi (academicians) ha ka prokram ba aiti ïa ka hukum mang pisa sha ka Tura Christian College hapoh ka Government’s People’s College Grant (PCG) in aid Scheme.

“Ha ki 2 snem ban wan ngin mad ka jingkiew kaba 15 haduh 18 percent ki samla pule kiba leit kolej, hynrei ka jingdon ki jaka shong ne kamra pule kam shym kiew lang kumjuh,” mutdur u Conrad.

U la ong ba wat la ka la mad ia ki jingïaleh ïakhun hapoh ka pule puthi, ka Sorkar ka ïeng beit ban aiti ban trei ban pynthikna ba ki samla pule ka jylla kin ym duh ka lad ban pule kham shalor.
U Myntri Rangbah (MR) u la ong ba ka Sorkar ka dang pyrkhat ban wanrah ïa ki kolej hapoh ka People’s College Grant in aid scheme.

“Ngi dang treishitom ban peit ki lad jingïarap pisa ban peit la ngi lah ban pynïar ïa ki skhim ban kynthup khambun ki kolej ha ki District, Sub-Division bad block namar ngi sngew ba ka donkam naduh tynrai,” u la ong.
Ka Tura Christian College kadei kawei na ki 9 tylli ki community college ha ka jylla kaba ïohpdiang ki jingmyntoi ka jingmang pisa ïa ki kam hikai bad ki nongtrei hapoh ka People’s College Grant (PCG) in aid scheme.