Shillong: U myntri ka tnad rep ka jylla, u Bah Banteidor Lyngdoh u la byrthen ia ki mahajon ban pyndonkam syndon da ka ain, lada kin dang bteng ban ot kilo beain ia ki mar rep, khamtam ha Iewduh, Shillong.
Haba kren myn hynnin ka sngi, u Bah Banteidor u la ong ba u la dep bthah ia u Deputy Commissioner ka East Khasi Hills, ba un leit tohkit ia ki mahajon kiba ot kilo beain ia ki mar jong ki nongrep ha Iewduh.
“Nga la bthah ia u Deputy Commissioner ban leit tohkit mardor ban lap ia ki briew kiba ot kilo beain ia ki mar jong ki nongrep ha Iewduh bad lada kane kam long kam, ngan leit ban jurip hi ha kawei ka sngi”, la ong u Bah Banteidor.
U la ong biang, “Lada lap ia kiba ot kilo beain ia ki mar jong ki nongrep, dei ban kem syndon ban aiti sha ka ain”.
Haba pynpaw ia ka jingpyrshah jur ia ka jingshah ot kilo ki mar rep, u myntri u la ong ba ki mar jong ki nongrep kiba thep ha ki byrni, haki kriah ki la shah ot kilo haduh 5-10 kilo. “Hato ka byrni, ka kriah kan khia haduh 5-10 kilo?”, u la buh jingkylli ia ki mahajon.
U Bah Banteidor ula kren ruh ia u Syiem ka Hima Mylliem bad kumjuh ia u CEM ka KHADC u Bah HS Shylla, ba kin leh eiei ia ki nongrep ba kin lait na ka jingshah ot kilo haki mahajon.
U Bah Banteidor u la ong ialade ruh u la long u nongrep bad u sngewthuh bha ia ka jingeh jong ki nongrep bad un trei na ka bynta ban bha ban miat.
Ha kawei ka liang, dang shen, ka Hima Mylliem ka la rai ba ki nongthied ki dei ban khate ia ki mar katkum ka jingkhia, da kaba thew ia ka kriah, ka byrni, ka khoh hadien ba la pynlait ia ki mar rep khnang ban tip katno ka jingkhia bad ym ban shu ot pathar 5-10 kilo khlem da thew ia ka jingkhia.
Ka hima ka la ong ba ka la maham ba ki nongthied kiba leh pyrshah yn sa leh da kaba tyngeh.