Kiba niah kali ha ka por ba la buaid, kin sa shah dain kuna 10 hajar, maham jur ki Pulit ia ki nongniah kali

Nongpoh, 12 Lber: Mynta ka sngi ka la don ka jingialang hapdeng ki Pulit pyniaid kali na Nongpoh Police Station lem bad ka kynhun ki seng Nongniah Auto Rickshaw, kiba don ha ka shatri jong ka Nongpoh Region Auto Owners and Drivers Association, (NRAO&DA), ki la shim syndon da ka rai kaba tyngeh ia kino kino ki dribar kiba pynkheiñ bad khamtam kiba dih kyiad ha ka por ba kamai paidbah.

Lyngba jong katei ka jingialang hapdeng ki Pulit bad ki nongniah Auto Rickshaw ha Sor Nongpoh, ki la shim ban leh da kaba tyngeh ia kito ki nongniah Auto kiba buaid ha ka por ba ki kamai ne kit ia ki nongleit nongwan.

Katei ka jingialang ba kyrpang hapdeng ki Pulit bad ki nongniah Auto, ka dei ruh hadien ba ki Pulit ki la lap ba bunsien ki jingjia aksiden bad kiba ju wanrah ruh ia ki jingjia ba sngewsih, ha kaba ka daw ka dei hadien ba ki nongniah ia ki kali, kata ka kynthup ia ki kali kamai bad ki kali shimet ruh kumjuh.

U Bah B. Thangkhiew, ophisar na ka tnad Traffic ka Nongpoh Police Station bad kumjuh ruh u President katei ka NRA&DA u Bah Banasar Lyngdoh, haba kren sha ki lad pathai khubor, ba nangne shakhmat kin shim noh da ki lad kiba tyngeh ia kino kino ki dirbar kiba pynkheiñ aiñ bad ruh wat ki trai Kali kiba ym don ka jingkitkhlieh ia ki dribar ban pynbiang ia ki kot ki sla bad khamtam ba ki ju dih kyiad ha ka por ba kamai paidbah.

Nalorkata, lyngba katei ka jingialang, ki la shim ruh ia ka rai ban iatrei lang ban tehlakam ia ki kali kiba ym don kot don sla naduh ki Permit, ki License, ki Registration Certificate bad kiwei kiwei ki kot ba donkam ba la maham ba ki trai kali bad ki dirbar ki hap ban pynbiang noh bad nangne shakmat lada lap ba ki pynkheiñ ain kin ngat beit ha ka jingpynshitom katkum ka Motor Vehicle Act.

Katba na ka liang u Bah B. Thangkhiew kum u ophisar na ka tnad Traffic, u la ai ruh ka jingbatai shibun halor ki kyndon jong ka Motor Vehicle Act, 1988 bad khamtam ia ki Dribar ba dih kyiad kin ngat ha ka kuna kaba 10 hajar katkum ka Motor Vehicle Act, 1988 jong ka section 185 bad kynthup ruh kiwei kiwei ki kyndon kiba ym pynbiang ia ki kot ki sla. La hap ban pyrkhing bha ban pyntreikam ia kitei ki kyndon aiñ ka dei namar ba la jur palat ki jingjia ba sngewsih bad bun ki dribar bad wat ki trai kali kim don kata ka jingkitkhlieh ban bud ia kita ki kyndon ba la buh da ka sorkar.