Shillong, 11 Jymmang:
U Myntri rangbah ka jylla u Dr Mukul Sangma u la ong ba kito kiba donkti ha ki kam beain ha ka tnad Sericulture and Weaving kin nym lait na kti ka ain. Haba kren sha ki nongthoh hadien ba la wai ka kynhun Myntri mynta ka sngi, u Dr. Mukul u la ong ba ka sorkar kan phah tohkit halor ka jingmih bad jinglap ka RTI ia ka jingpyndonkam bakla ia ka pisa ban siew tulop sha ki briew kiba don tang ka kyrteng rngai khlem trei kumba la lap da ka RTI ba la pan jingtip da ka Thma u Rangli (TUR).
Hynnin ka sngi ka TUR ka la pynlong ia la jingialang sngap paidbah halor ka jinglap ia ka jingpyndonkam bakla ia ka pisa da ka tnad Sericulture and Weaving haduh ba kiba la shah beh kam ki dang ioh pisa ha ka jingthoh thik thik. Nalor kane ka don ruh ka jingbym iahap ia ka jingpyni ha ka jingthoh bad ka kingdon ki nongtrei.
“Kito kiba la leh beain kin hap ban siew ia ka dor kaba khraw na ka bynta kane”, la ong u Dr Mukul bad bynrap, ba ka sorkar ka lah ban thung da ka jingtohkit kaba kham khlain ym shuh tang da ka tnad kaba dei peit ia kane ka kam.
U la ong ba kano kano kaba wanrah sha ka jingtip ka sorkar halor ka jingleh beain, ka sorkar kan shim khia ia kata ka kam bad kiba donkti kin ngat ha ka ain. U la ong ba ka long kaba kongsan ban pynsngewthuh ia ki briew ia ka ain ba lada ki leh beain kin sa shah trei. “Da kane ka lynti, kan pyntieng ia ki ban leh iaki kam beain”, u la ong.
Hynnin ka sngi, ka Thma u Rangli (TUR) ka la pynlong ia ka jingsngap paidbah halor ka jingduna bad ka jingshah ban bein ki nongtrei muster roll ha ka tnad Sericulture and Weaving. Ha kane ka jingsngap paidbah, la lap ba bun ki briew kiba mih tang ka kyrteng khlem kano kano ka jingtrei kiba ioh tulop pat thik thik nalor ba ka jingdon jong ki nongtrei bad ka jinglap ha ka jingtip RTI kam iahap tara satia.
Kaba kham sngew lyngngoh ka long ba ia ki nongtrei muster roll kiba la shah beh kam naduh u snem 2015 hynrei la pyni ba la siew tulop haba ka tnad ka la ong ba kam don pisa nalor kiwei ki jingioh ba ki dei, katba kine ki nongtrei muster roll kim bna eiei bad ki la kyndit ynda la ioh ia ka jingtip ha ka RTI.
Ka kong Rangad, ka la ong ba kin leit ban ujor ia kane ka bamsap ba shyrkhei sha u State Vigilance Commissioner ban dawa ban thung ia ka jingtohkit halor kane ka jyrsieh bamsap ha kane ka tnad.
Phi don ban ong eiei?