Kiba lah ban mareh pulit Meghalaya, dei tang kiba jop Olympic:Paul

Shillong, 10 Lber:
U MLA ka UDP na Shillong West u Bah Paul Lyngdoh u la takrain ia ki kyndon thungkam ka tnad pulit ia ki kynthei, ba ka long ka sngew thamula. “Ha ka jingpynmih ia ka jingpynbna thungkam, ka tnad pulit ka la buh kyndon ba ki kynthei kiba aplai ki dei ban mareh hapoh 7 minit ne duna ha ka jingjngai kaba 3 km. kane ka jingbuh kyndon ka long kaba lyngngoh ba wat ki nongmareh ba long nyngkong ha ka Olympic ruh kim pat lah ban pyndep ia kane ka jingjngai”, la ong u Bah Paul Lyngdoh haba wanrah ia kane ka mat hapoh ka iing dorbar thawain mynta ka sngi.
“Ki kynthei ba mareh ha ka Olympic ha ki snem ba la dep kum ha u snem 1975haduh  1993, ki pyndep 8 minit tam ha ka jingjngai kaba 3 km. Kumno ki kynthei jong ngi kin pyndep ha kane ka por ba la buh da ka tnad pulit. Hato ka tnad pulit ka pynmareh ban thungkam ne ban pynmareh Olympic”, la ong u Bah Paul Lyngdoh.
Kat kum ka jingong u Bah Paul Lyngdoh, u chairman ka Central Recruitment Board  ka la pynmih ia ka jingpynbna ban thep kam 1425 tylli ki kam ha kane ka tnad.
U Bah Paul Lyngdoh u la ong ba kane ka jingleh jong ka tnad pulit ka long kaba dkoh haduh katta katta bad dei ban pynbeit ia kane ka jingbakla.
“Ia kane ka tnad dei ban pyniaid da ka kynhun jong ki stad ki jhad, ym da ki riew shimet ne ki katto katne”, ula ong.
U Bah Paul Lyngdoh u la ong ruh ba ka jingkhang ban aplai bun ki kam, ka dei ka jingbuh kyndon kaba bakla ba kane ka tnad ka la leh ia  kaba bakla. “Wat ka UPSC ruh kam ju khang ia ki kandidet ban aplai bun ki kam ba lait hynrei ka shong ha ki samla ban jied”, u la ong.
U la kdew ruh ba katkum ka jingpynbna, la kdew ruh ba ki kandidet ki dei ban nang ban kren ia kata ka Regional Language bad u la kwah ban tip kaei kata ka regional language haba ha Meghalaya lait na ka ktien phareng, dei tang ka ktien Khasi bad Garo kaba la ithuh kum ki ktien bynrap.
Haba jubab ia kane ka mat ba la wanrah da u Bah Paul Lyngdoh, ka myntri kam pohiing ka Kong Roshan Warjri ka la pynthikna ba ka sorkar kan bishar biang ia kane ka kam bad kan sa leh ia kaba donkam.
“Lada don ka jingbakla, ngin sa pynbeit ia kane”, la ong ka Kong Roshan.