Kiba khlem kam ha Meghalaya, ki don tang 1.5 percent

Ka sorkar India, ka ai jingkhein ha Parliament, halor ka jing kyrduh kam kaba don mynta ha ka Ri hi baroh kawei bad ha kaba iadei bad ka thain shatei lam mihngi, la pyni ba ka jingduh kam ka bun tam ha Nagaland, kaba long 21.4 percent, katba ka Meghalaya, ka don ia kiba khyndiat duh, ha kaba ki don tang 1.5 percent kiba duh kam.
Katba kum ka jing jurip jong ka Periodic Labour Force Survey na ka bynta u snem 2017-18, la lap ba nalor ka Nagaland, kiwei pat ki Jylla kiba bun ka jingduh kam ki long ka Manipur bad ka Mizoram.
Lada pynrung ia ki jylla rit, la lap ba ka Nagaland, ka dang wan ha jrong duh hi, kiba duh kam, katba ka Dadra bad ka Nagar Haveli, ka mih bujli ha ka jaka jong ka Meghalaya, namar ba kiba duh kam ha katei ka Jylla rit, ki long tang 0.6%. Lait na ka Meghalaya, ka Sikkim ruh, ka dei ka jylla, kaba don khyndiat kiba khlem kam.
Kiba duhkam ha Meghalaya, ki long 1.5 percent, ha Nagaland 21.4 percent, ha Arunachal Pradesh ki don 5.9 percent, ha Assam 8.1 percent, ha Manipur 11.6 percent, ha Mizoram 10.1 percent, ha Tripura at 6.8 percent bad ha Sikkim 3.5 percent