Shillong: U Conrad K Sangma, myntri rangbah ka jylla, u la iathuh ba ki briew ki ba leh ia ka jingshim wai ban tih maw poh khyndew, kin hap ban siew 100% ia ka bai licence bad kane ka long kat kum ka rai jong ka kashari.
Haba ia kren bad ki lad pathai khubor, hadien ba la kut ka jingialang jong ka kynhun myntri, u myntri rangbah u la ong ba kat kum ka rai na ka kashari, ka long ba ki briew ki don ia ka licence jong ka mining lease kin hap ban siew 100% ia ka stamp duty na ka 50% na kaba ki la dep ban siew.
Na ka liang jong u myntri rangbah, u la iathuh ba kane ka long ba kat kum ka jingbatai ha ki por ba kham mynshuwa ba ka jingshim wai ia ki par ia ki mar hapoh khyndew ka hap hapoh ka instrument of conveyance bad kat kum ka instrument of conveyance ki riewlum (schedule tribe) bad ki rit paid (schedule caste) kin ioh ban siew tang 50%.
Kat kum ka rai jong ka Court ka long ba ka jing ioh ia ka licence ban tih ia ki mar hapoh khyndew (mining lease stamp duty), kam dei kaba hap hapoh ka instrument of conveyance, kumta ki briew kiba ioh ia ka licence ban tih mar poh khyndew kin hap ban siew 100%.
La iathuh ba ia kane la hap ban pynbeit ha kaba baroh ki ba don ia ki licence ban tih ia ki mar hapoh khyndew kin hap ban siew ia kaba sah 50%, 50 % hap siew noh mardor katba kaba sah ka 50 % yn ai lad ban siew ha ka 31tarik u lber 2021. U myntri rangbah ka jylla, u iathuh ba na kane ka 50% kaba kine ki ba don ia ki licence ban tih mar hapoh khyndew kin hap ban siew, ka sorkar kan ioh ban lum kumba 27 klur.
Ka Cabinet ka la pdiang ruh ia ka rai aban pynkylla ia ka Meghalaya Fiscal Responsibility Budget Management (MFRB) Act 2006 bad la pdiang ruh ia ka ordinance ha kaba ia dei bad kane ka bynta.
Ha ka jingialang jong ka Cabinet mynta ka sngi ka la pynbeit ia ka jingpynhiar ia ka khajna jong ka petrol bad diesel bad pdiang ruh ia ka dor ba thymmai jong ka khajna ha kajuh ka por. Kane ka iadon bynta halor ka rai ban khate T.2 shi litar, na ka khajna petrol & diesel bad ia ka dor ba la pynhiar hynnin ka sngi kaba long T.5.
Phi don ban ong eiei?