Kiba ioh khun sniang na ka sorkar, ki hap siew ram hapoh 8 snem

Shillong:U myntri ka tnad ri jingri ka jylla u bah AL Hek ula ong ba ki khun sniang ba sam ka sorkar sha ki nongrep, ka long ba ki hap siew pynkhuid ia ka ram kaba ai por haduh 8 snem.

Haba jubab ia ka jingkylli ba la wanrah u MLA ka Mawhati u bah Charles Marngar ha ing dorbar mynta ka sngi, u bah Hek ula ong ba kam don ka jingburia haba iap ki sniang ha ka Piggery Mission.
“Ka jingiap ki sniang na ka African Swine Fever ka jia ha Ri, Bhoi, West Khasi bad Eastern West Khasi, West Garo Hills, bad ha East Khasi Hills. Ka don ka injek ia kane ka jingpang”, la ong u bah Hek, bad bynrap, “Ia ka ram, hap ban pynkhuid hapoh 8 snem”.

Hynrei ula ong ba ki nongri sniang ki hap ban thep insurance ia ki sniang bad kin ioh T. 4000 lada jia ba iap uwei u sniang.
Haba bynrap lang ia ka jubab, u myntri rangbah u Conrad K Sangma ula ong ba ka sorkar ka ai ram sha ki Cooperative Society ha ka kam ri sniang bad ki don ruh ki prokram ba ka sorkar ka sam khun sniang sha ki nongrep namar ba ka hap ban bud ia ki kyndon ba la buh ka sorkar pdeng bad ki don ruh ki skhim ba la bei ka sorkar jylla.

Ha kajuh ka por, u Conrad ula pyntip ba ka sorkar jylla ka la pynkhreh ia ka Hospital Mrad ha Upper Shillong hapoh ka skhim PM DEVINE ne ka Prime Minister’s Development Initiative for North-East Region (PM-DevINE) skhim ka sorkar India ha ka jingmang kaba T. 30 klur.