“Kiba ialeh pyrshah kin pdiang jingpynshitom ha lade hi”. Rom 13:2

Rev. B.P.Pohsngap

Ha kum kane ka por ka saw ka sian ka jingsheptieng ia kane ka jingpang covid-19, ngi la dei ban long ki briew kiba shu Kohnguh beit ia “ ki bor ba ha khlieh” namar ki long kiba la ai bor na U Blei hi. Nga ioh khubor na kylleng ki nongshong shnong ka Ri ba ieit jong ngi, ki don kiba Kohnguh bad ki don ki bym Kohnguh ruh. Kat kum ka ktien U Blei, la shai bha ban tip bad ban sngewthuh lada ngi Kohnguh hynrei “KIBA IALEH PYRSHAH KIN PDIANG JINGPYNSHITOM HA LADE HI”.

Haba pyrshang ban iaid da kaba sumar, ha la shnong ba ngi ia shong ia sah ruh, ka paw ba bun ki bym Kohnguh ne kim sngewthuh, ki pynkhein ia ka adong jong ka shnong ka thaw bad ia kaei kaba la pyntip ne pynbna da ka ain ruh. Kum kiba don ka jingsngewkitkhlieh lang ia ka iap ka im ka jaitbynriew, ngi dei ban ia pynkynmaw, lada sngap ne lada kim sngap ruh, yn iai pynkynmaw. Katto katne ngin phai sha ka ktien U Blei, kumno ka jia ia “KIBA IALEH PYRSHAH”.

1. Ha ka por U Moses :- Ia ki briew kiba ialeh pyrshah, ka kitab Deuteronomi 17:12, ka ong, “ U briew uba nud leh meng khlem da shah shkor ia u lyngdoh uba ieng ban Shakri ia U Trai hangta, lane ia u nongbishar, te ia uta u briew yn pyniap noh, bad yn pynduh noh ia kata kaba sniew na Israel”. “ Bad uta u paidlang baroh, un iohsngew bad kin sheptieng ruh, kin nym nud leh meng shuh” Deut 17:13. Ka por u Moses kat kiba ialeh pyrshah dei ba pyniap noh. Kane ka juk mynta te, lada leh tyngeh ka sorkar tang ban ai jingpynshitom ruh ia kito ki leh meng, bym sngap ia ka maham, ne ia ka adong, kito kiba leh meng, ba ki bein ia kiba Kohnguh ia ka adong ka sorkar, da kaba ong , ki tieng eit, ki rit jingngeit, ki ktah wat ia ki Rangbah Balang bad ia ki Pastor ruh.
2. Ha ka por U Syiem Persha:- Ha ka por ka jingsynshar U Artakserksis u syiem Persha, “ U Esra u ba long u nongthoh uba nang bha ia ka hukum U Moses, ia kaba U Trai U Blei ki Israel, U la ai” Esr 7:12, ka ong kumne , “ Bad jar u bym leh ia ka hukum U Blei jong me, bad ia ka hukum U Syiem, to pyndep ia ka jingbishar halor jong u kumne kumne, la u dei ban iap, lane ban beh shnong, lane ban kurup mar, lane ban set byndi”. Kane ka dei ka por ki syiem hyndai, kaba ki pyntrei kam ia ki bym Kohnguh. Ka rukom buh pud ki nongsynshar ka long kaba donkam eh, ban peit thuh ia kiei kiei kiba jia man ka sngi. Ha ka por U Esra 10:7 – 8 ka jia ka adong shnong ha Jerusalem, “ La pynbna ban ialum ha Jerusalem hapdeng lai sngi, jar u bym shym la wan hapdeng lai sngi, katba kum ka jingsneng ki rangbah bad ki tymmen basan, yn kurup noh ia ka spah jong u baroh, bad yn pyniakhlad noh ia u hi na u paitlang ka jingpynwir”.
3. Ha ka por ki Apostol :- kane ka dei ka por jong ngi mynta Rom 13:1-2 “ To ai ba ka mynsiem baroh kan pynhapoh ialade ha ki por kiba ha khlieh”. Namar ym don kano kano ruh ka bor na U Blei; te kita ki bor kiba don la buh beit ia ki da U Blei kein, kumta kein uno uno uba ieng ialeh pyrshah ia kata ka bor, u ialeh pyrshah ia kata ka jingbuh beit ka jong U Blei; te kita kiba ieng ialeh kumta kin IOH PDIANG IA KA JINGPYNSHOITOM HALADE HI”. Ha ka jingshisha tang ba la pynbna paidbah, ka jingiatiplem hi kan kyntu ia ngi ha la ki dohnud ki mynsiem kum ka Ri tip briew tip Blei, hynrei teng teng la iohi pynban kum ka syrngiew tip ksuid tip khrei.

Ko ki para Ri para Jaitbynriew, ba la ngeit ba la tip ia U Trai ne ki bym pat tip ne ngeit ia U Jisu, to ngin Kohnguh beit ha ki jingpyniaid “ ki bor ba ha khlieh”, namar kane ka adong ka dei ia ka jingbha jong ngi hi ban sumar ia ngi na kane ka khlam kaba shyrkhei. Kam long kaba bha ia kito kiba bein kiba khoh ia ki lyngdoh, ki nongiathuhlypa, naduh mynshuwa bad mynta ruh don kiba bein kiba khoh ia ki Rangbah Balang ia ki Pastor kaba kum kane, lada kim kylla kabamut, ka jingpynrem kan sah ha ka dohnud jong ki haduh ha khmat U Blei namar ba kim Kohnguh ia ki “Ki nongsynshar” ba don burom jong ka Ri ka Jait bynriew. To sumar ioh ba phin “PDIANG IA KA JINGPYNSHITOM HA LADE HI”. Amen.