Shillong, 15 Jylliew:
Hadien ba la ioh jingtip ba ki don ki trai pung kiba ju pynlong ia ka jingkob khwai dohkha na ka por sha ka por ha ka pung jong ki, ka ophis u Deputy Commissioner ka East Khasi Hills District ka la pynmih ia ka hukum ba yn ym shah shuh ban pynlong ia ka jingiakob khwai lymda ki nongpyn khwai kim ioh ia ka jingbit na ka ophis u Deputy Commissioner.La maham ruh ba kiba pyn kheiñ ia katei ka hukum kin ngat ha ka jingpyn shitom katkum ka aiñ. Ha ka juh ka por,u Chief Executive Member ka KHADC u bah Pynshngaiñ N Syiem u la pynbna ba ka District Council kan ym shah ia kino kino ki ba pynlong ia ka jingiakob khwai dohkha ba kin pynlong khlem da ioh ia ka jingbit na ka KHADC.
Haba kren sha ki nongthohkhubor hadien ba la wai ka jingialang Executive Committee ki MDC ka KHADC mynta ka sngi u CEM u la ong ba la ia kren halor ka United Khasi-Jaintia Hills District Fishery Act 2nd Ammendment Bill-2016 kaba yn wanrah ha ing dorbar ka KHADC ka ban sdang ha ka 20 tarik mynta u bnai. Katkum katei ka Bill u CEM u la ong ba ka KHADC kan pyrkhing ia ka jingpyniap ia kidohkha dohum ha ki pung ne ki wah da kaba pyndonkam da ki kynja bih lane da kaba kawang jar bad lada lap ia kiba pynkheiñ ia katei ka aiñ yn daiñ dukan ia ki haduh T.50 hajar tyngka ryngkat ki jingpynshitom kumba shah ka aiñ.
U CEM u la ong ruh ba yn pynbna ia katto katne tylli ki wah kum ki wah kiba dei ban tyngkai (Protected River) bad lada don kiba thmu ban pynjot ia kitei ki wah da kaba pynjakhlia ne pyniap dusmon ia ki dohum kin ngat ha katei ka kuna ryngkat ki jingpynshitom kiba ki lah ruh ban shong phatok. Ha kaba ia dei bad ka jingiakob khwai dohkha u CEM u la ong ba ki nongpynkhwai ki dei ban ioh jingbit shuwa khnang ba kin shim ka jingkitkhlieh ba kan ym pynjakhlia ia ki pung ki wah la ka long ka pung ki riew shimet ne ka pung paidbah. Haba la kylli na u CEMkatno ki nongai khwai ki hap ban siew na bynta katei ka jingbit ba ki hap ban pan na ka KHADC, u la ong ba kam donkam jingsiew eiei.
Shuh shuh ka KHADC ka la pynbna ba yn ym shah ban tei ing lane kino kino ki jingtei harud wah,lane yn ym shah ban pynkhyllem ia ki dieng ki siej kiba don harud wah bad ia kane ka EC ka KHADC ka la ia kren ruh halor ka United Khasi Jaintia Hills Autonomous Management and Controll of Forest 6th Ammendment Bill 2016 hynrei lada jia ba ka dei ka kam kaba kim lah shuh ban kiar kaba donkam kyrkieh ki hap ban pan jingbit shuwa na ka KHADC. Ha katei ka Bill kaba yn ia kren kham bniah ha ing dorbar u CEM u la ong ba ka KHADC ka don ka jingthmu ban pynneh pynsah ia ka mariang ha kaba kan kyntu ia baroh ki Dorbar shnong Dorbar Raid bad Dorbar Hima ba ki dei ban don kawei ka Law Adong ne ka Law kyntang ha ki shnong jong ki bad kane kan treikam salonsar ha baroh ki shnong.
U CEM u la ong ruh ba shen ka KHADC kan pynmih da ka jingpynbna ba kan jied ia kino kino ki khlaw ba kan shim kum ka khlaw kaba yn pynbiang pynbiang lang lane kaba yn ia long trai lang hapdeng ka District Council bad ki Hima kumba long ka khlaw Mawpat ka hima Mylliem.
Phi don ban ong eiei?