Kiba duk shu thang ei, kiba kham riewspah tang T.80 shibnai, ka bai ding na ka sorkar Assam ha ka shnong Umlaper

Nongpoh:Ka shnong Umlaper, Raid Nongtung kaba don ha kata ka thain Block-2 kaba bun kiba tip paidbah, ka shnong khappud bad kaba dang hap hapoh ka jingiakren pynbeit pud hapdeng ka sorkar Meghalaya bad Assam, ka la ioh bording na ka sorkar Assam ha kine ki 3 snem eiei kiba la leit noh.

Haba sakhi halor ka rukom pynpoi bording ka Assam ha katei ka shnong lem bad ha kito ki shnong ba sah da kiwei ki jaidbynriew bym dei Khasi, ka dei kaba kham pher bad kaba buh jingeh ia ki riew shim kabu ban kin tuh bording, namar la shu pynpoi bording na kawei sha kawei ka shnong, da kaba pyniaid lyngba ki post Ilektrik bad ia ki sainar bording pat la sop janai bha.
Haba pyrshang ban kylli na ki briew kiba sah ha katei ka shnong, ki la ong ba katei ka por ka la poi ha katei ka shnong ha kine ki 2 ne 3 snem kiba la leit noh, ha ka jingiakren bad ki, ki la ong ba ka bai bording ruh ka tad bha, ha kaba ka poi tang kumba T.80 ei ei ha ka shibnai bad ia kaba ka bai bording ruh, ki briew ka tnat bording na Assam, ki wan shim hi na kito ki iing kiba pyndonkam ia katei ka bording na Assam.

Kaba sngewtynnad shuh shuh, ba tip halor katei ka bording ba la pynpoi da ka Assam ha katei ka shnong, ka long ba na bynta kito ki briew kiba duna ka ioh ka kot, ki shu ai ei bad ba kin thang bording katba ki mon, hynrei ia katei ka T. 80 ha ka shibnai, la shim tang ia kito ki briew kiba kham biang ha ka ioh ka kot.
Katkum ka jingiathuh da ki briew shnong, ki la pynpaw ruh ba ka bording ba la pynpoi da ka Assam ha katei ka shnong, ka dei ka bording ka bym ju thut wat ha ki por ba Lyer ne hap u Slap, hynrei ka shu lip tang tengkhat.
Ka dei pat ka jingshisha, ba wat la ka Assam ka leit ban lehbha haduh katta sha katei ka shnong, hynrei don ki paidbah Khasi kiba sah ha shnong Umlaper, ba kim treh ne shim ia katei ka bording ba pynpoi ka Assam.

Kumba la long ha shnong Umlaper, la ioh jingtip ba kumba ka long mynta, ki briew sorkar na Assam, ki la leit ban pan kot pan sla na ki paidbah kiba shong ha kiwei ki shnong Khasi ha katei ka thain, ha kaba ki la pan ia ki kot jingpynshisha, kum ki Epic, Adhaar, Bank Passbook lem bad kiwei, ha kaba ka jingleit pan jong ki, ka long na bynta ban pynpoi bording bad ban sam ei sha ki paidbah ha kitei ki shnong khappud.