Shillong:Dang shen bun ngut ki nonghikai kiba ia khun ia ka eksam Meghalaya Teachers Eligibility Test (MTET) ki la shah dawa pisa lyngba ka telephone ha ki briew ki bym ithuh bad don napdeng ki nonghikai kiba la shah dawa pisa T.40 hajar tyngka bad don ruh kiba shah dawa haduh T.1 lak tyngka bad kita ki briew kiba kren ha ka phone ki la kular ia ki ba lada ki siew ia katei ka pisa kin pynpass ia ka eksam MTET.
Halor kane u Director of Educational Research and Training (DERT), u la ujor ejahar sha ki pulit ka Laitumkhrah bad don ruh napdeng ki nonghikai kiba la ujor ejahar sha ki Police Station ba hap hapoh ka jaka sah jong ki.
Mynta ka sngi pat ka Khasi Students Union (KSU) Central Body lyngba ka Education Cell jong ka ki la leit ban ia kynduh ia u SP City u bah Vivek Syiem ban buddien aiu ki pulit ki la leh ia kane ka kam.
Haba ia kren bad u Asstn, General Secretary ka KSU Education Cell u samla Shiningstar Kharbihkhiew u la ong ba u SP u la iathuh ba ki pulit kim shym la shongthait satia, hynrei ki dang thwet ia ki briew kiba donkti ha kane ka kam. U samla Kharbihkhiew u la ong ruh ba ka jingslem ki pulit ban ioh kem ia kiba donkti ka dei namarba ki phone number kiba la phone sa ki nonghikai ki dei ki number kiba nabar jylla suda.
Lah ban pynkynmaw ba u Director jong ka Educationational Research and Training (DERT) u bah J.P Lakiang, u la ujor da ka ejahar sha ki pulit ka Laitumkhrah Police Station ba ki don kum kita ki briew kiba dawa pisa na ki nonghikai bad ha ka ejahar u la pyntip sha ki pulit ba kita ki briew ki phone lyngba kine ki phone number ..8274811311, 8651937021, 9748932668,9903539075,9477215089 bad 8811814152. Hynrei nalor kitei ki number phone kiba u Director ERT u la dep ujor sha ki pulit ruh, ki dang don sa kiwei pat ki phone number kiba la pyndonkam da kita ki riew thok bad uwei na kita ki number u dei +91 8420637752 uba la phone sha kawei ka nonghikai kaba sah ha Lumdiengjri.
Phi don ban ong eiei?