Shillong:Namar ka jingeh ba ki nongrep ki ia kynduh ha ïewduh na ka daw ka jingshah ot kilo ha ki Mahajon kiba thied ia ki mar-rep jong ki, mynta ka sngi u Myntri ka rep ka riang jong ka sorkar jylla u bah Banteidor Lyngdoh u la hiar sha ïewduh ban jurip dalade hi bad ban ia kynduh ia ki nongialam. La synran ia u myntri sorkar da u CEM ka KHADC u bah H.S Shylla , u Acting Syiem ka Hima Mylliem u Pa’iem Ainam Manik Syiem bad kiba khraw ba tri ka Hima Mylliem ryngkat ki ophisar sorkar. Ka la don ruh ka jingialang ba lyngkot ha ïew die lang ban pynshai ia ki nongrep halor ka jingot kilo.
Haba kren ha katei ka jingialang kaba lyngkot, u bah Banteidor Lyngdoh u la ong ba ka jingshah ot kilo ki nongrep kam dei shuh ka mat kaba dang thymmai hynrei kaba la ia kren na ka por sha ka por hynrei balei pat ka dang iai bteng watla ka bor Hima bad ka bor District Council ki la pynmih ia ka hukum ba dei ban sangeh noh ka ot Kilo. U ong ba kum u myntr ijong ka rep ka riang u sngewkhia ka mynsiem ban iohi ha ki kotkhubor ba ki nongrep ki dang shah khniot da kaba ot kilo, kumta u la wan dalade hi ban ia kynduh markhmat bad ki.
Ha katei ka jingiakynduh bad ki nongrep u la ong ba lada lap nangne shakhmat ia kiba ot kilo, ki nongrep ki dei ban pyntip sha ka ophis u Syiem ka Hima Mylliem lane ban ujor sha ki bor ka aiñ bad ia kita ki briew yn thep shapoh phatok. “Naduh kham mynshuwa nga la ong ba lada dang lap ia kiba ot kilo, ngan ym map hynrei imat kim tieng, wan pyntip lada phi dang lap nangne shakhmat ba dang shah ot kilo, Ngan thep sha ruh Nar , ngan sa pyllait pat ynda ki la ih ka shkor” ong u bah Banteidor Lyngdoh bad ki nongrep ki la risa shaw.
Utei u myntri sorkar u la kren sngewkhia ruh halor ka dor ka mur ba ki nongrep ki shah khniot, “Ha kiwei ki jylla ia ka dor ki mar-rep buh dor hi da u nongrep hynrei ha ngi buh dor da u khar Kaia, nga kyntu ia phi ba phi dei ban ia tylli mlon kawei ba ki bor ba nabar kin ym lah ban shim kabu ia u nongrep jong ngi” u la ong.
Shuwa ia kane u Acting Syiem ka Hima Mylliem u Pa’iem Ainam Manik Syiem u la pynsngew sha ki nongrep ba ka Hima ka la dep ban pynbna ia ka hukum bay m shah shuh ban ot kilo bad lada don kiba leh kumta u la ong ba la dep ban ong naduh mynshuwa ruh ba ki nongrep ki dei ban pyntip sha ka hima ba kan leh ia kaba donkam. Nangne shakhmat u la ong ba lada don kano kano ka jingbym sngewhun ha ïewduh ki nongrep bad ki paid nongiew ki lah ban wan sha ophis u Syiem ban tip khnang ba ka hima kan leh ia kaba donkam.