Kiar na ki jingkren, pyn iapher jaitbynriew: Mukul

Shillong,18 Naiwieng:
U Myntri Rangbah ka jylla u Dr.Mukul Sangma u la bthah ia ki bor ba dei peit ia ka ain ha ka jylla ba kin peit ngor bha ban wanrah ia ka shongsuk shongsain ha ka jylla. U Sangma u la ong ba ki nongbat ain ha ka jylla ki dei ban pyrkhing bha bad ban pyntreikam ia ka katkum ka jingdonkam khnang ba ki briew kiba pynkhein ain kin tieng kin smiej. U la ong ruh ba donkam ruh ia ki briew ba kin kiar na ki jingleh kulmar bad ki jingpynkhein ain. Lah ban kdew ba ki jingjia kiba la jia ha ka sngi saitjain ba la dep ba u wei u bar jylla u la shah kawang petrol bomb ha ka dukan sha jong u ha Bishnupur, tang khyndiat bnai hadien ba u wei pat uba shah kawang Petrol bomb ha dukan jong u ha motphran u la iap , ka la pynlong ia u Myntri Rangbah ban bthah ba ki bor ka ain ki dei ban pyrkhing bha.
U Sangma u la kyntu ia ki paidbah baroh ba ki dei ruh ba husiar ia ki ktien ba ki kren bad ki kam ba ki leh ban kiar na kano kino kiba lah ban pynmih ia ka jingiapher jaitbynriew. U la ong ruh ba donkam eh ia ki nongialam kiba don ka jingkitkhlieh na ka bynta ka jylla ba kin kiar na kum kitei ki jingkren kiba lah ban wanrah ia ka jingiapher jaitbynriew.