Shillong, 14 Nailur:
Ki MDC jong ka KHADC khamtam ka KHNAM bad ka HSPDP ki la sah lyngngoh ia ka jingleh phoi ki MDC ka UDP ban dawa hiar shuki CEM ia u Bah Ardent Basaiawmoit watla ki la pynpaw ba ki la hun ha ka jingialang jong ka ARPA ba dang shen.
Haba kren mynta ka sngi bad u EM ba peit ia ka trade u Bah Latiplang Kharkongor u la ong ba ha ka jingshisha ha ka jingialang jong ka ARPA ba dang shen baroh ki MDC ka UDP ki la pynpaw ba kim don eiei shuh ban pyrshah ia u Bah Ardent hynrei ki la ong ruh ba kin leit rah ia katei ka khubor sha ka seng Kmie.
“Hynrei kaba lyng ngoh ka long ba hadien ba ki la iakynduh ia ki nongialam ka seng Kmie ki la kylla ktien ban dawa biang ba u Bah Ardent u dei ban hiar shuki”, la ong u Bah Latiplang.
Une u nongialam ka KHNAM u la ong ba ka jingiai dawa ka UDP ban weng ia u Bah Ardent ka lah ban don ka jingiasuh buit pynban bad ka Congress khnang ban ioh pynpra ia ka ARPA.”
Tang namar ka jing kynnoh ba kim ioh kren ha ki jingialang bad ba leh hi u Bah Ardent ban thung ia u Standing Counsel, ki la dawa ban hiar shuki u Bah Ardent”, la ong u Bah Latiplang.
“Ha ka jingshisha ha ka jingialang ba dang shen ha Motphran, u Deputy CEM Bah Teinwell Dkhar u la ai ia ka jingkren jong u bad ha ka jingialang hapdeng ka shnong Thyllaw bad ka Mawlongbna u Bah Ardent u la kylli shwa na ki MDC mano mano ban ai jingkren bad na ka liang u Bah Teinwell u la ong hi kren tang u CEM la biang”, la iathuh u Bah Latiplang bad u la bynrap ba ia ka jingthung ia u Standing Counsel la leh da ka jingai jingmut da ka UDP uba dei u briew jong ka hi.
U la iathuh ba ha ka jingialang jong ka ARPA ba ladep na ka liang u Bah Ardent u la kubur ba u lah ban don ka jingbakla ha ka jinglong briew bad u kloi ruh ban iapynbeit ia kata ka jingbakla.
“Ngi la ia kylli ha ka jingialang ia ki MDC ka UDP la ki la biang ne em ka jingpynshai jong u Bah Ardent ne ki dang donkam shuh hynrei baroh ki ong ba ki la biang bad ym don eiei shuh bad ki la ong ba kin leit rah ruh ia katei ka khubor sha ka sneg Kmie”, la ong une u nongialam ka KHNAM.
Pynban hadien ba la iakynduh bad ki nongialam ka seng Kmie kine ki MDC ka UDP ki la pynmih biang ia kajuh ka jingdawa pyrshah ia u Bah Ardent. ” Ngi la sngew lyngngoh halor kane ka jingleh jong ka UDP”, la ong biang u Bah Latiplang.
Katkum ka jingong jong une u nongialam ka KHNAM, ki jingdawa ka UDP kam long kaba shongnia namar lah ban ia pynbeit hapoh ka ARPA.
Ha kajuh ka por u Bah Latiplang u ong ba ka jingialang jong ka ARPA ba la buh ban long ha ka 15 tarik Nailur ka la sah ha ka umdum hadien ba ua Bah Ardent u la pynbna paidbah ban ai ia ka rai ha ka jingialang ban long ha ka 19 tarik Nailur. Halor ka jingkylli la u sngew iahap ne em ia ka jingong ka UDP ba kan kyrshan namar lada neh u Bah Ardent, u Bah Latiplang u la ong ba kane ka jingong ka UDP kam don jingmut eiei namar haba kyrshan namar ka mut ba ki kwah tang ban wad daw.
Phi don ban ong eiei?