Ki trai Petrol pump ki kloi ban weng ia ka ejahar, ka shnong Bhoirymbong Lumdaitkhla pat ka leh kyllain

Nongpoh: Tang mar ia tip ba u nongialam ka seng ha ryngkat ki dkhot ka seng, ki la shah kem ha ki Pulit, halor ka jingshah kynnoh ba ki la leit ban pynkulmar ha ar-tylli ki Petrol Pump kiba don ha Bhoirymbong Lumdaitkhla bad ha Umroi Umdohbyrthih, kiwei pat ki nongialam ka CoRP, hynnin ka sngi ki la leit ban iakren ia ki trai jong kitei ki Petrol Pump, na ka bynta ban poi sha ka jingiakren sngewthuh jingmut hapdeng u nongialam jong ki bad ki briew kiba dei peit ia kitei ki Petrol Pump.

Ha katei ka jingthmu kitei ki nongialam ka CoRP ban leit iakren ia ki trai jong kitei ki Petrol pump, ki la leit nyngkong ban iakren ia trai jong ka Petrol pump kaba don ha Umroi Umdohbyrthih bad ha ka jingiakren ki CoRP, ki trai Petrol Pump bad nongialam shnong, ka la poi sha ka jingiasngewthuh jingmut, ha kaba u trai Petrol pump bad nongialam, kim shym la ujor shuh kano kano ka Ejahar pyrshah ia utei u nongialam ka CoRP.

Hadien kata, kitei ki nongialam ka CoRP ki la leit ban kynduh sa ia u trai jong ka Petrol pump, kaba don ha shnong Bhoirymbong Lumdaitkhla. Ka jingiakren hapdeng ki CoRP bad utei u trai ka la kham long kyllain khyndiat, namar na ka liang ki bor shnong Bhoirymbong Lumdaitkhla, ki la dep ban ujor Ejahar bad la mih ruh ka kyntien jingkynnoh ba ki bor pyniaid shnong, ki la pynbor ia ki trai katei ka Petrol pump ba kin ai beit da ka Ejahar pyrshah ia u Bah Bandary Ryntathiang, President ba rangbah ka CoRP.

Haba kren sha ki lad pathaikhubor, u Bah Karbius Lyngdoh, vice-president ka CoRP, u la ong ba kum ki nongialam ka seng kim kwah ba katei ka jingjia kaba rit eh bad ha ka jingbakla kum u briew yn pynheh ia ka. U la ong ruh, ba ha ka jingiakren ki nongialam ka seng bad ki trai jong kitei ki petrol pump, ki la poi sha ka jingiakren sngewthuh jingmut, hynrei kaba ki don jingthut khyndiat ka dei ia ka Dorbar shnong Bhoirymbong Lumdaitkhla, namar la don ki jyrwit jyrwat bad ka long kaba kyllain shaba palat, namar lada ki leit kynduh ne kren lyngba ka phun, ka la don ka jingsaitkti uwei ia uwei pat, kaba mut ba kim kwah ban ia mab markylliang ha ki jingbakla, pynban ki kwah beit ban iakhun markynti, ha kaba kum ka seng kan hap hi ban pdiang ia kata.

Na ka jingkren utei u nongialam ka Corp, la sngewthuh ba kum ka seng ki kloi ban ia mab lada kano kano ka jingbakla, hynrei lada kim kwah ban poi sha ka jingiakren sngewthuh jingmut ne ia mab markylliang, ka seng ruh kam sngewpher ia kata, hynrei ka seng ka longkloi ban bud lada ki ialam sha kano kano ka bynta ruh, u la bynrap.