Ki tin ki khia bad ki sarang kloi bad ki lah ki aluminium, ong u myntri, halor ka jingkynnoh ka HYC, ba sam da ki tin kiba stang

Shillong:Hadien ba ka Hynniewtrep Youth Council (HYC) ka la leit ban khynra ia ka kudam buh tin tap ïing, bad lap ba ki tin ki long kiba stang bniap bniap, na ka liang u Myntri ba khmih ia ka tnat Housing, u Marcuise N Marak u la bthah ban tohkit da ka tnat lane ka Departmental Enquiry.

Haba kren mynhynnin ka sngi, u Marak u la ong ba u la ioh ia ka jingujor na ka seng HYC, bad mar mar u la wad jingtip halor katei ka jingujor. U la ong ba hadien ba la pan jingshai na ka tnat, la iathuh ba ha ka jaka ki tin (CGI) Corrugated Galvanized Iron sheet, la pynpoi da ki Corrugated Alluminium sheet, da kaba ong ba ki alluminium ki kham bha bad kham shan, wat la ki kham stang bad sting, katba ki tin ki kham khia bad sarang kloi, bad dei na kane ka daw ba ka tnat ka la mynjur ban thied da ki alluminium.

U Marak u la iathuh ruh ba hadien ka jingujor jong ka HYC, u la thung ia ka kynhun tohkit ban tip kham bha ia ka jingshisha la ki mar ki poi kumba la iateh lane la don kiba leh shutia, bad kane ka jingtohkit kan shim por kumba shibnai.

Haba kylli, u Myntri u la ong ba katkum ka jingtip ba u la ioh, kam shym la don satia kano kano ka jingbakla, hynrei u la ong ba watla katta hadien ba la dep ka jingtohkit bad lada lap ba ka don ka jingleh shutia yn shim kam da kaba tyngeh ia ka company bad wat ia ki ophisar jong ka tnat.