Ki taksi, kin iaid kamai da ka jingkhein metre

Bah Monarch Shabong

Ka sorkar Jylla, ka la shim ia ka rai kaba skhem bha, ha ka jing iadei bad ki taksi kamai bad kata ka long ba nangne shakhmat, kin khein bai kali noh da u metre, ha kaba la ong ruh ba katei, ka long ka ain jong ka sorkar India, lane kaba ki ong, ka Motor Vehicle Act.

Ka sorkar Jylla, kam pat kren shai bha halor katei ka phang bad kata ka long, la ka don jingthmu ban pynduh noh ia ka shong taksi ia bhah lane sharing system ne kan dang iai bteng ban ia shong ia bun, kumba ju leh baroh shi katta. Hynrei ha ka jingkhein metre, ngi thikna, ba kan nym long kaba suk, lada ngi dang iai bteng ban ia shong ia bun bad ka daw, ka long, namar ba tang shu ia shong ia bun, uwei un hiar, uwei un kiew bad kumta, la hap ban buh bun tylli ki metre, hynrei lada buh tang uwei, kumta ka jingkhein metre, kan nym iaid kam satia haei haei ruh bad kan mih ka jing ia mai ia tim, kaba man ka minit, hapdeng u nongniah bad u nongshong taksi.

Lyngba ka jingwan jong kane ka pakhang shnong bad ka jing ia shong jngai, ha kaba ka bai kali, ka la kiew lai bad saw shah, kumta lada iaid noh da kane ka jingkdew jong u metre bad ban shu wai noh ia ki taksi, kan long ka nuksa kaba bha shi katdei; namar ba hangne hangi, ka la long ka jinglehrain kaba palat liam, ha kaba ha ka kali maruti, kaba dei ban shong tang lai, lane saw ngut, hynrei la ia shong tyngkhap da ki 6,7 ngut bad katei ka long kaba isaitmet bad kaba ailad ruh ia ki riew shim kabu, khamtam, lada ia shong ia khleh bad kam dei tang katta, hynrei ka long ruh kaba sngew tieng shi katdei, khamtam ia ka kynthei briew, ha ka miet ka iong, ban leit da kitei ki taksi shonglang, namar ba wat mangi ruh, lada ngi leit jingleit shabar, ngim ju kwah ban ia shong ia bun, namar ba ngi shait sngew tieng, ioh kitei kiba shonglang, ki dei ki nonglute, ne ki nongkloh pla (khamtam lada dei leit sha dkhar, ba ki ju jyllei bha kine ki kam runar).

Ki nongniah taksi, khlem pep, kin sngew pyrshah ia kane ka ain, hynrei ka sorkar, kan hap ban pyrkhat (i) ia ka jing ia shong jngai iwei ia iwei pat, kaba dei ka ain jong ka pyrthei ha kine ki sngi bad (ii) kan hap ban bud ia ka ain motor vehicle jong ka sorkar India, namar ba ha kylleng ka India, ka don tang ka ia shong bus lang bad kam ju don satia ka ia shong taksi lang.