Shillong: Ha ka kyrwoh kaba la pynmih mynta ka sngi, ka ophis jong U Commissioner of Transport jong ka sorkar Jylla, ka maham tyngeh ban ieng kali harud ki surok bah National Highway, lait noh ha ki jaka ba la mang lypa da ka National Highway Authority of India (NHAI).
La bthah ruh ba baroh ki kali, kim dei ban iaid kiba khlem number plate bad ba ki dei ruh ban tah da ka High Security Registration Plate (HSRP), katba kum ka ain 50 & 51 jong ka Motor Vehicle Act, 1989 bad ia kiba pynkhein, yn pynshitom, katba kum ka ain Motor Vehicle Act, 1988.
Ka kyrwoh ka ong shuh shuh, ba ka la mih ka jing ujor kaba jubor ia ki taksi kamai, namar ba ki kyntait ban kit briew bad ba ki khein ruh ha ka dor kaba rem shibun. La bthah namarkata, ba kin kit briew, sha kaba ki nongleit jingleit ki donkam, nangta ba kin nym kit palat na ka mang ba la buh bad ba kin nym khein palat ruh na ka dor kaba la buh da ka sorkar bad la maham ba kito kiba pynkhein ia ki kyndon, kin lah ban shah pynduh ia ki laisen, ia ki permit jong kitei ki kali pynkhein ain lem bad ki nongniah ruh.
La maham ruh ia baroh ki kali, ba kim bit ban kit palat pud, na kaei kaba la mang da ka tnat pyniaid kali jong ka sorkar Jylla bad kito kiba kit palat pud, kin shah dain kuna.
Phi don ban ong eiei?