Ki surok kiba kham kongsan, ban pynheh kloi

Da U Bah Philip Marwein

Ki surok bad ki lynti ki synkien ki long u budlum jong ka ioh ka kot bad ka roi ka par ha kano kano ka jaka la ha sor ne ha nongkyndong. Ki surok hi ki long u shabi ba plie ban pynstet ia ka leit ka wan bad ka kit ka bah bad kiba pynstet ia ka ioh ka kot. Ka Meghalaya mynta ka la kynjoh 47 snem ka rta bad haba phaidien sha ki 47 snem mynshuwa ka Meghalaya ka la kiew bha ha ka jingdon ki surok. Hooid, ka dang dei ban ioh shibun ki surok khamtam ha ki jaka kyndong.

Ngi la don mynta kawei ka surok Four Lane, ngi la don ruh bun tylli ki surok double Lane bad ngi la don bun tylli ki state road bad ngi la don ruh bun tylli ki PYMGSY road hynrei la katta ruh ngi dang donkam bun tylli ki surok bad ka road connectivity ha Meghalaya haduh mynta ka dang poi tang kumba 38 ei ei na ka 100. Ngi dang donkam shibun ki surok Four Lane bad ki Double Lane (two lane) ha ka jylla ban pynstet ha ka leit ka wan ka kit ka bah bad ka roi ka par. ngi dang donkam ban pynbha bad pyniar ia ki state road bad kumjuh ruh ia ki PYMSY namar kiba bun na ki mynta ki la jot rathai bad ki la tor shibun. Ka jingroi stet jong kano kano ka Ri lane ka jylla ka shong ha ka jingdon jong ki surok kiba bun bad kiba bha.
Ka Amerika ka ka la roi stet haduh katta katta dei na ka jingdon bun ki surok kiba bha, kiba paka bad kiba iar ha manla ki jaka, la ha sor bad ha ki jaka kyndong. Dei na kane ka daw ba ka jylla Meghalaya ruh ka donkam shibun ki surok bad ki dei ban long kiba iar bad kiba bha.
Ka jingdon ki surok kiba bha bad kiba iar ka iarap ban poi stet na kawei ka jaka sha kawei pat. Mynshuwa ka ju shimpor 12 kynta ban poi na Shillong sha Tura hynrei mynta la lah ban poi tang hapoh ka 6 kynta ne duna. Na Shillong sha Guwahati ka ju shimpor 4 kynta mynshuwa hynrei mynta tang shi kynta shiteng lane 2 kynta. Na Shillong sha Nongstoin la ju shimpor haduh 4 kynta tam ban poi mynshuwa hynrei mynta ka shimpor tang 2 kynta.Ka long kumne kein lada ki surok ki la iar bad kiba kham bha.
Mynta ki don ki surok kiba kham kyrkieh bad ki dei ban pyndep noh, pynbha bad ban pynlong ki Two Lane. Kine ki dei ka Umtyngar-Sohra-Mawlong-Ichamati-Bholaganj, Lad Mawreng-Mawphlang-Weiloi-Mawsynram-Balat-Ranikor-Moheskola-Baghmara, Mairang-Patharkhmah-Ranigodown, Nongstoin-Rambrai-Kyrshai, Nongstoin-Maweit-Kulang-Nongjri, Riangdo-Athiabari-Hahim, Nongstoin-Rangblang-Wahkaji-Phlangdiloin-Ranikor, Nongstoin-Mawkyrwat, Weiloi-Mawkyrwat-Rangthong-Nongnah-Ranikor, Nandipur-Tikrikilla-Medhipara-Rongsai-Bajengdoba, Resubelpara-Damra, Baghmara-Nengkhra-rongjeng, Dalu-Baghmara, Tura-Garobadha-Phulbari-Tikrikilla, Umsning-Mawhati-Jagi Road, Pasyih-Garampani-Haflong, Ummawlong-Nartiang-Kdiap-Khanduli, Tura-Dalu-Chokpot-Sibabari, Garabadha-Ampati-Zigzag-Mahendraganj bad kiwei kiwei ki surok kiba donkam kyrkieh noh ban pyndep. Lada pyndep ia kine ki surok kan iarap shibun ia ka Meghalaya ban pynstet ia ka leit ka wan bad ka roi ka par.
Ka jingeh kaba khraw ha Meghalaya ka long ban ioh jaka lane khyndew ban shna surok, namar ka jaka ka dei jong ki paidbah ym jong ka sorkar. Ban shna surok bad khamtam ban pyniar ia ki surok la donkam shibun ka jaka. Ki trai khyndew ruh ki bynnud ban ai namar ka khyndew ka long kaba kordor bad ka surok ka bam jaka shibun. Ka sorkar ka shem jingeh ban siew bai khyndew namar lada ka siew, tang ka bai khyndew ruh ka la donkam peisa da ki bun klur tyngka bad ha kaba kut nangno yn ioh sa ka peisa ban shna surok. Namar ban shna surok ka rem bha, khamtam lei lei lada shna ia ki surok Four Lane bad Two Lane. Ka sorkar ka shna pynstet ia ka surok lada ki trai jaka ki ai ei bad lada ioh ia ki trai jaka kiba ai ei ban shna surok ka long ka jingkyrkhu kba khraw ia u paidbah kynthup ia ki trai jaka. Dang ha kine ki sngi ngi iohsngew ba u Chief Minister jong ka Meghalaya ryngkat kiwei ki Minister ki la leit sha Delhi ban leit iakynduh ia u Minister jong ka Ri India u ba dei khmih ia ki surok ha ka Ri bad ban leit pan peisa na ka bynta ka jingdonkam ia ki surok ha Meghalaya kynthup ia kitei ki surok haneng. Ngeit skhem ba u Minister jong ka sorkar pdeng un shah shkor ia ka jingkyrpad jong ki bad ka sorkar pdeng kan bei peisa na ka bynta ka jingdonkam surok palat jong ka Meghalaya.