Shillong:Ki sur jingrwai ki la long ka bynta kaba khraw shibun eh ha kine ki sngi, ban khring ia ki nongthep vote bad kumba long ha ka elekshon MLA 2018 bad wat ha ka elekshon MDC 2019, kumta mynta ka sien ruh ka elekshon MP, la shlei mam da ki sur jingrwai jong ki arngut ki kandidet ha ki thup jong ka you tube bad kiwei ki social media bad kitei ki long ki jingrwai shaphang U Ma Vincent Pala, kandidet ka seng Congress bad nangta ki jingrwai shaphang U bah Jemino Mawthoh, kandidet jong ka seng UDP.
Kawei ka thup jingrwai da ka RMKM Video feature, ka don haduh mynta ka sngi ia shi hajar ngut kiba peit bad katei ka jingrwai, ka ong kumne “Khynriam U Pnar U Bhoi U War, bunsien nga ju kylli, hato ym nud u nongialam na seng riewlum jongngi. Balei ban sah ha jinglehrain ko jaitbynriew Khasi, la dei ka por ban kyndit thiah, ieng joit ko para ri”.
Ka jingrwai ka ong biang “Kawei ka sur la iamon lang bah Jemino Mawthoh, u riew shemphang ka ri khasi, pyrthei kan sa lyngngoh, un rah ka bom na ri khasi, un tied hapoh delhi, kan sa sawa ha dorbar bah ka nam jong u khasi”.
Katei ka jingrwai ka ong biang “Ki sohkyrdot ka ri khasi mano ban loit ban law, u dei ban mih na seng riewlum, ko lok to da kynmaw, oh ha ka bom oh ha ka bom, ale ngin ia tylli”.
Ki kyntien ki ong shuh shuh “Ka NPP, ka NCP, ka HSPDP, ka PDF, u mawlynnai, ka bom ngin ia tylli, ngin ia kyrshan kawei ka sur burom ka ri khasi”.
Kawei pat ka jingrwai jong ka Innovate, ka don 22 hajar ngut kiba peit haduh mynta ka sngi bad katei ka jingrwai kaba la rwai da ka ktien Pnar, ka ong “U Ma Vincent, uba uba pynieng da ka Congress parti, uba pynjop ar term da phi”. La ong biang katei ka jingrwai “Ha kane ka sien ia kyrshan ia u ma Vincent pala, ka vote ksiar ma Vincent pala ba iohi jngai,na pyrdi u khasi pnar u bhoi u war, u khon dap shynrang wa satar, ieng tylli lang iashon lang waroh ha dur ka kti, ka symbol ba saindur naduh ioh state i haduh katni” bad la ong shuh “Hei Meghalaya bad khasi jaintia, ioh state phi kaba pura dei na kti ka indira Gandhi, shibor ieng tylli baroh ha ka Congress parti”.
Kitei ki jingrwai, ki dei kiba la rwai da ka sur tem phareng bad ki jingtem kiba kynjih stet shibun, khamtam ka jingrwai Pnar, kaba la rwai na bynta U Ma Vincent Pala.
U Rupang, ula pyrshang ban wad jingtip halor katei ka rukom pynmih jingrwai bad U bah James Lyngdoh, nongialam jong ka seng Congress, ula ai jingmut ia u nongthoh ban kylli hi na u kandidet, katba U Bah Alan Dkhar, u nongialam jong ka seng UDP, um shym la shim ia ka phone, hynrei, ula shu phah mesej ba u dang don ha jingialang bad haba la kylli shaphang ka jingrwai, um shym la jubab shuh satia.
Phi don ban ong eiei?