Ki ‘social media’ ki long kum u ‘Dr Jekyll bad Mr Hide’

Shillong, 4 Nailar:
Ka jingmih jong ki social media ne ki lad sam khubor kum ka Face book, Twitter bad kiwei ki long kum u “Dr Jekyll bad u Mr Hide”- ha kaba uwei u briew u lah ban wanrah ia ka jingbha bad kaba sniew ruh ha kajuh ka por.
Katkum ka kot pule klas X, la shem ba uwei u briew u lah ban kylla ar ngut– u Dr Jekyll u dei uba wanrah ia ka jingbha bad u Mr Hide u dei uba leh ia ki kam sniew bad ki social media kim pher na kane, namar ba ki lah ban wanrah ia ka jingsniew bad kaba bha ruh.
Ka jingiatainia kaba la long ha kane ka sngi Saitjain halor kane, ka la pynpaw ba ki social media ki long kumta.
U member secretary ka Meghalaya Information Technology Society (MITS) u Bah Donald P Wahlang u la sngew ba donkam ban don ki kyndon ha ka rukom pyndonkam ia ki ‘on-line media’ kiba la paw kum ki lad sam khubor ba iaid iew bha ha kane ka juk.
“Da kaba buh ia ki kyndon, kan don ka jingpeitngor ia ka jingpyndonkam ia kine ki lad sam jingtip”, la ong u Bah Wahlang haba kren ha ka jingiatai halor ka phang, “ka jingmih jong ki Onine Media-ka jingktah ha ka imlang sahlang bad ka synshar ka khadar” kum ka jingdap snem ka khubor online ka www.ohmeghalaya.com ba la long ha kane ka sngi Saitjain.
Katkum ka jingong u Bah Wahlang, ki ain ki wan ha bun rukom, kynthup na ka sorkar, na ki nongai interner bad kiwei ki lad ban pietngor.
Lada ym tehlakam, kan don ka jingma na ki online media.
U la ong ba mynshem snem, la don ka jingphet shnong kaba jur da ki briew na kane ka thain North East na South India kaba la pynlong tang na ka sms bad facebook bad kiwei ki social media.
“Lada ym don ki kyndon ka sorkar kan shem jingeh ban khang lad ia ki khubor khlien tyngab kiba ialam bakla ia ki paidbah” u la ong.
Shwa ia kane, ka myntri kam sor, ka Kong Ampareen Lyngdoh ka la ong ba ki lad pathai khubor ki wanrah ia ka jingbha bad ka jingsniew.
Ia kane ka jingiatai la pyniaid da u vice chancellor ka Martin Luther Christian University (MLCU) u Bah Robert G Lyngdoh.
Kiwei kiba iashim bynta ha kane ka jingiatai ki long u Chief Executive Officer (CEO) ka World Development Forum u Harsh Shrivastava, u Samudra G Kashyap, u Special correspondent ka Indian Express, Pradyot B Manikya, Editor – in – Chief ka North-East Today (TNT).