Ki Sngi ba la leit noh

Babu Kular Khongjirem

(Ba bteng..) Ka dkhot kaba ar (dk.2) kalong kaba donkam bha namar ki nong set jongkylli ha SSLC Examination ki ju sngewtynnad bha ban set na kane ka dkhot.Ka sdang da ki kyntien’Ha sngap ha ri Sohra…..Sha u Khasi,u Pnar,u Bhoi,ne u War’.

Ha kane ka dkhot, u myllung u iathuh ba ha ri (shnong) Sohra ha kito ki por,ka shait don ka jingiasiat thong manla ka sngi iewbah Sohra(hapdeng ki Sohra bad Mawsmai),Ka iewbah Sohra ka ju long shisien shi taiew kumba long iew lem kiwei kiwei ki thain.Ka sngi iewbah Sohra ka ju hap ruh ha man la ka sngi iew Rynghep,(sngi iew khasi).

Ha man la ka sngi iewbah Sohra,ka ju don beit ka jingiasiat thong,kaba dei ka rong biria u Khasi bad kane ka jingiasiat thong la ju ia leh hapdeng ki Sohra bad ki Mawsmai.Kane ka jingiasiat thong ka la neh slem bha ha kito ki por namar ka jingia jop kalong mar mar kylliang.Don ki sngi iew kiba jop ki Sohra, bad ha kawei pat ka sngi iew,ki jop sa ki Mawsmai bad kumta shi kumta.Kane ka rongbiria(jingialehkai) ka la long kaba shong shit bha ha kito ki por kham palat ia ka jingshong shit ka jingialehkai phutball ne basket ball jong kine ki por.

Ha ka jingiasiat thong ki khasi,ki nongswar ne nongpyrkhat ki ju pynieng ia la ka nia hok bad ka kular hok katkum ka kular bad ka ktien hok ba ki la ia kut ne kular ki ar liang mamla.Kat kano kano ka liang ne ka mamla kaba ksan ka kular/ktien hok ha khmat ka mei Hukum, kata ka liang ka la tikna beit ban jop bad ban ioh khur ia ka pisa iathong(ka thong).Na kata ka daw,u myllung u ong,’Ka riew ka jingrisa ban ieng ka dawbah!’.Kane ka mut ba,kaba ioh ban risa ka dei ka mamla kaba jop namar ka la lah ban pynksan ia la ka kular/ktien Hok hakhmat ka mei Hukum.Ia kata ka jingksan ka hok,u myllung u ong ‘ka dawbah’.

Ka jingrisa bad kymhoi ka mamla(liang)kaba jop ka sawa bad ngam sha kylleng ki krem pubon kiba don sawdong ka shnong Sohra.Ym tang ba ka ngam sha ki krem pubon ka Sohra hynrei kane ka jingsawa na ka jingrisa bad kynhoi ki liang kiba jop ka kiew bad sawa bad par ruh sha suin kat haduh ba ki iohsngew ki briew kiba shong marjan bad ka shnong Sohra.Ha kito ki por ba ym pat don kot khubor,Radio,Tv ne mobile ne internet kumba long mynta, kane ka khubor jong ka jingjop/jingrem ha ka jingiasiat thong la ju kwah tip lem da ki briew kylleng ka ri Khasi-Jaintia kumba ki kwah ban tip ia ka khubor World Cup ha kine ki por.

Hynrei ha kito ki por pat,ia kane ka khubor la rah bad pynphriang da ki nong wan iew kylleng ka ri jongngi ha iewbah Sohra.Dei kine ki nongwan iew kiba iathuh ne pyntip bad pyn phriang ia ka khubor ba kin ia tip lut ki briew kylleng ka ri Khasi-Jaintia, naduh u Khasi, u Pnar, u Bhoi,ne u War bad u Lyngngam ruh solonsar.(pule ba ngin bteng biang next issue ioh phi babe kylla hadien).