Ki skul sorkar ha ka Jylla

Bah RM Shabong

Ka sorkar Jylla, ka don jingthmu ban khang noh ia ki 200 tylli ki skul bapher, halor ka nongrim ba ki dei ki skul kiba ki duna ki khynnah skul; hynrei ha shwa ba ka sorkar kan shim ia katei ka rai, ka la dei shwa ban lum jingtip, na ki khynnah skul, na ki bor pyniaid shnong, ba kin iathuh lem ia ka daw jong ka jinghiar jong kiba kum kitei ki skul sorkar bad ha kajuh ka por, balei ba kiwei pat ki skul, kiba pyniaid da ki kynhun seng niam kum ki balang, ka seng Khasi, kiwei ki mishon ba ki iaid bha ha kitei ki juh ki jaka, wat la ki don ki nonghikai lane ki iing skul, ki bym da biang satia.

Ka nuksa kaba ka sorkar Jylla, ka dei ban shim nyngkong, lada ka poi sha katei ka rai, ka long ba kumno haba ka bai skul, kaba tad, ki nonghikai kiba biang, ki iing skul kiba i khain, hynrei wat ki skul sorkar ha Shillong, ki dei ki bym lerkam bha satia bad ki dang lah da ki skul ba ki pyniaid kiwei pat ki kynhun bad kumta, lada ka jingmut ban khang ka don ia ki 200 tylli, ka la biang ban pynrung ruh ia ki katto katne ki skul sorkar, kiba don ha ka nongbah Shillong, namar ki la bun than ki skul bad ban ailad ia ki skul nongkyndong, ba kin iai tyllun suki suki.

Ha kajuh ka por, ka la dei ruh ia ka tnat pule puthi, ba ha shwa ba kan weng ia kitei ki skul, ka dei ban kynmaw, la kitei ki skul, ki la rakhe katno phew lane spah snem, ha kitei ki jaka ba ki don lane kaba mut, ba lada ki la tyllun 20 lane 30 snem mynshwa, balei pat mynta ba ki hiar kynsan noh bad ka dei ban don ka daw bad ka daw bah ka long ka jingleh sting jong ka tnat pule puthi, namar ka la ailad than ia ki nonghikai ba kin leh mon.
Ha shwa ba kan don kano kano ka rai, ka sorkar Jylla, ka la dei ban ailad ia katto katne na kitei ki skul, ha ka jing pyniaid ki kynhun niam, lada dei ia ka Seng khasi, Ramakrishna Mission, lane sha ki balang kristan bad hangta, ngin sa ia peit, ba kin long kumno bad lada ki nang sniew, ka la don ka daw bad lada ki nang bha ruh, hangta ngin iohi ba ka don sa kawei pat ka daw, lane kaba ngin kynnoh ba ka dei ka jingleh sting bad ka jingleh bym salia jong ki nonghikai.
Kan bha ia ka tnat pule puthi, ba kan pyrkhat bha ia katei ka mat, namar ba ngi ju tip ba ka kam pyniaid skul, ka ju long hi, kum ka kam die kek ha ka por Kristmas ha kine ki sngi bad ka kam, kaba shu kiew stet bak bak (khlem da iakren ha sor ne ha nongkyndong), hynrei lada u kek u dei uba sma iewkhong, hangta kein, ka don ka daw, ba ym don shuh kiba kwah bam.