Ki skul ki khlem pynthymmai ia ki kot, ong u heh ka MBOSE

Shillong:U Controller of Examination ka Meghalaya Board Of School Education(MBOSE) Tura, u Bah T. R Laloo u la ong ba na ka liang ka Board haba ka la wad jingtip bad kylli na ki nonghikai jong kitei ki skul kiba kitei ki khynnah ki la ud la nam, kitei ki nonghikai ki la ïathuh ba kane ka jingwan jong ki jingkylli ki bym dei katkum na ka kot pule jong ki khynnah, ka dei namar ba ka skul ka khlem pynthymmai satia ïa ki kot pule kumba la leh lem da kiwei pat ki skul.

Ia kane u bah T. R. Laloo u la iathuh ha ka jingiakren lyngba ka fone call bad u nongthoh khubor jong u Rupang.
U bah Laloo u la ong ruh, “Ngi la kylli na ki nonghikai hi namar ha kaba kut ki dei ki nonghikai kiba tip ïa kane ka daw ha kaba ki la ong ba ka daw kaba kongsan tam ka dei ba ki don ki skul ki khlem pynthymmai ïa ki kot pule jong ki, kata ka dei kawei na ki daw kaba lehse ka la pynlong ïa ki khynnah ba kin ym lah ïa ki jingkylli jong ka subject Social Science”.

Ka jingiakren bad u bah Laloo ka dei hadien ba la mih ka khubor, ba nakaliang ki khynnah skul na kylleng ki skul, ki la ud la nam ha kaba iadei bad ka jingset jingkylli ka MBOSE ia ka subject Social Science ka bym dei napoh ka Text Book.