Ki skul Jowai ki ioh jingiarap na ki Fete, pyllait pakhang surok miet

Shillong, 3 Nohprah:
Haba kyrpad ia ki 9 seng ba kin weng noh ia ka pakhang surok miet kaba ar miet kata ka 5 bad 6 tarik mynta u bnai namar ba ka ia tyngkhuh bad ka Fete ba ka Dorbar dong ka pynlong, ka dorbar dong Tympang Iawmusiang Jowai ka la ong ba kiba bun bah na ki skul hapoh sor Jowai ki ioh jingiarap lyngba ki Fete bad lada ym lah ban weng ia ka pakhang surok miet kan long ka jingduh nong kaba khraw ia ka imlang sahlang.
Katei ka dorbar dong ka la pynbna ruh ba lada jia ba ki 9 seng kim weng ia ka pakhang surok miet kumba ka dorbar dong ka la buh jingkyrpad na ka liang jong ki ruh kin ym ai jingkyrshan shuh ia ki 9 seng ha ka por ba ki donkam ia ka jingkyrshan nangne shakhmat.
Ka Dorbar dong ka la pynpaw ruh ba ha katei ka sngi ka la dep ban buh sngi ba ki kynhun nongrwai na Delhi ka Heaven Down kan wan ban tem, bad lada jia ba ka pakhang surok miet kan iaid beit kan pynthud ia ka leit ka wan u paidbah uba thmu ban wan sha katei ka jaka pynlong Fete.