Shillong: Ka Sorkar jylla mynta ka sngi, ka la shim ia ka rai ba ki skul Sorkar bad ki skul ba ioh ioh jingiarap na ka sorkar (deficit School) ki dei ban shim ia ka bai skul ka ban long tang 50 % katba ki skul ki ba pyniaid da ki riew shimet kum ki skul niam bad kiwei kiwei kin shim tang ia ka bai skul (tuition fees) na ka bynta ki 3 bnai, ia kane la iathuh da u symbud myntri rang bah ka jylla u bah Prestone Tyngsong.
Ha ba ia kren bad ki lad pathai khubor, na ka liang u bah Prestone u la iathuh ba ki skul kiba pyniaid ka sorkar bad kiba ioh jingiarap na ka sorkar ki dei ban shim 50 % ka bai skul na ka bynta u bnai Iaiaong,u bnai Jymmang bad Jylliew.
Katba ki skul kiba pyniaid ki riew shimet ki balang bapher bapher kin shim tang ia ki bai skul (tuition fees) bad ki dei ban pynlait noh ia kiwei kiwei ki jing siew na ka bynta u bnai Iaiong, Jymmang bad u bnai Jylliew.
U bah Prestone u la ong ruh ba na ka bynta kito kiba la dep siew lupa ia ka pisa na ka bynta ki 3 bnai ba don ka jingpakhang shnong (Lockdown) kin sa pynbeit na ka bynta kiwei pat ki bnai.
U bah Prestone u la iathuh ruh ba na ka liang ka sorkar Jylla kam pat shim ia ka rai ban plie noh ia ki skul ha ka jylla namar ba ka dang ap ia ka rai ban shim na ka sorkar pdeng.
Phi don ban ong eiei?