Ki Skhim ka sorkar kumba rep kba ha ri shyiap:FKJGP

Shillong, 17 Jymmang:
Ka Central Executive Committee (CEC) jong ka Federation of Khasi Jaintia and Garo People (FKJGP) kaba long mynta ka sngi ka la shim ia ka rai ban pyntyllun shakhmat ia ka thong sha ka ioh ka kot bad ka imlang sahlang (Socio-Economic Movement). Ka FKJGP ka la pynrem ruh ia ka sorkar namar ka jingbym lerkam ha ki kam pynroi ha baroh ki liang khamtam ha ka Aquaculture Mission, Horticulture Mission, Livestock Mission bad kiwei kiwei.
Kate ka seng ka la ong ba ka sorkar ka la pynsyrwa kai ia ka pisa u paidbah bad mynta ba la jan ka elekshon ka la sdang ban bret kulmar ia ki skhim kiba long kumba rep kba ha ri shyiap. Ka kyrwoh khubor ka la ong ba kan peitngor bha ha baroh ki kam pynroi ha ka jylla khnang ban lah ban pyntyllun ia katei ka thong jong ka. Ha ka 25 tarik katei ka seng ka la ong ba kan hiar sha Phlangdilon ban ia kynduh ia ki nongrep. Ka la pynrem jur namar ka jingbym lah ka sorkar ban teh lakam ia ka jingkhaii masi tuh sha Bangladesh. Kawei pat ka mat ba kate ka seng ka la rai ka long ba baroh ki Unit, ki Circle ki District ki dei ban peitngor bha halor ka jing pynrung kyrteng ka sorkar ia ki bar jylla ha electoral roll khnang ba u bar jylla u bym dei hok yn ym dei ban rung kyrteng da lei lei ruh ha electoral roll jong ka jylla tang na ka bynta ka jingioh jingmyntoi jong katto katne ngut ki politishian.
Katei ka seng ka la thung ia u bah Elton Cliff Warjri kum u Assistant General Secretary, ka la thaw saw tylli ki Sector – ka Agriculture Sector – ba ialam da u bah Kynsai War bad lai ngut ki dkhot, Tuesday Lytep, Bishar Dhar bad Ferdinal Iawphniaw. Ka Skill Development Sector ba ialam da u Kitboklang Nongphlang, ki dkhot, Elton Cliff Warjri, Kmenlang Tariang bad James Kharbani, ka Livestock Sector, ba ialam da u bah Marbud Dkhar, ki dkhot Constantine P Mawlong, Edar, Bep bad Lui Lyngdoh bad ka Tourism Sector – ba ialam da u Eldie Newron Lyngdoh ki dkhot Reginal Thabah, Energy S Cajee bad Ksanbor Kharshiing. Kane ka long katkum ka kyrwoh na u bah Eldie Newton Lyngdoh, Information Secretary.