Shillong: Hadien ba na ka liang jong ki katto katne tylli ki shnong, ki la kyrpad ia ka sorkar ban ym phah pahara ha ki Central Force, na ka liang jong ka sorkar ban pynthikna ba kan ym don kano kano ka kam beain ha kine ki shnong ka la rai ba phah pahara ha ki pulit jong ka jylla.
Haba ia kren bad ki lad pathai khubor, na ka liang jong u myntri rangbah u Conrad K Sangma u la ong ba ka kam ram ba ha khmat jong ka sorkar ka long ban pynbiang ia ki bor pahara ha ki jaka ba donkam, kham tam hadien ka 15 tarik mynta u bnai.
U la ia thuh ba hadien ka jingjia ha ka 15 tarik, ka la don ka jingkyrpad na kiba bun ki bor shong ia ka sorkar ba kim dei ban pahara ia ki CRPF lane ia ki Central force ha kum kine ki jaka ba don ka jing ia kajia, kumta na ka liang ka sorkar ka la pdiang ia kane ka jingkyrpad jong ki, ha kaba ka la rai ban pynphah pahara da ki Meghalaya Police (MLP) ha kito ki jaka.
“Na ka liang jong ka sorkar ka la pdiang ia ka jingkyrpad ki bor shnong ha kaba ngi khlem phah shuh ban pahara ia ki Central Force ha ki jaka ba don ka jingkajia hynrei ha ka jaka jong ki la buh da ki pulit jong ka jylla ba kin pahara ha ki katto katne ki jaka ki bym long shngain” u la ong .
U la ong ruh ba ka sorkar ka kwah pynthikna, ba kan ym don ka no kano ka kam beain ha kito ki jaka, kumta ka la rai ban phah pahara ia ki pulit na ka jylla.
U la iathuh ruh ba bun na ki Sengbhalang ki Rangbah shnong ki ba la pynpaw ia ka jingsngew, ba ka dei ban don ka jingpahara jong ki pulit na ka jylla bad lada don, ka jingpyrshah ka lah ban long ba tang na ki katto katne ngut hynrei bun na ki, ki ia hap ban pahahra hi ia ki pulit na ka jylla.
Phi don ban ong eiei?